Në një kohë kur sfidat ndaj vlerave të luftës po bëhen gjithnjë e më të theksuara, ish-ushtari i Ushtrisë Çlirimtare të Kosovës, Sami Fejza, ka bërë një thirrje të fuqishme qytetarëve që të bashkohen në protestën e organizuar nga shoqatat e luftës. Protesta do të mbahet më 7 gusht, në ora 17:00, në Sheshin “Skënderbeu” në Prishtinë.

“Në histori, ka momente kur populli ngrihet jo sepse do luftë, por sepse nuk ka më rrugë tjetër për liri. UÇK-ja ishte zëri i atij populli – një ushtri e lindur nga vuajtja, padrejtësia dhe shpresa”, thekson Fejza në deklaratën e tij publike.

Ai rikujton se në vitet më të errëta të Kosovës, kur dhuna dhe mohimi i të drejtave ishin të përditshme, ishin pikërisht burrat dhe gratë që nuk pranuan të heshtnin ata që formuan radhët e UÇK-së – një lëvizje që nuk kërkoi kurrë lavdi personale, por liri për popullin e vet.

“Ata që u bashkuan me të lanë pas gjithçka – familjet, jetën, rininë – për një ideal që tejkalonte çdo interes personal: lirinë e Kosovës. Emrat e tyre janë të shkruar në zemrat e një kombi që nuk guxon të harrojë”, vijon më tej ai.

Fejza thekson se liria e fituar me gjak kërkon ruajtje dhe dinjitet. Për të, protestat si kjo e 7 gushtit janë më shumë se reagim – janë kujtesë kolektive dhe thirrje për drejtësi.

“Pas çdo lufte vjen përgjegjësia – si të kujtohet e kaluara, si të ndërtohet e ardhmja. UÇK-ja është pjesë e pandarë e historisë sonë, dhe ruajtja e vlerave për të cilat u luftua është detyrë e brezave që sot gëzojnë lirinë.”

Me këtë mesazh të qartë dhe të fuqishëm, Sami Fejza fton të gjithë qytetarët që t’i bashkohen protestës si një akt qytetar dhe atdhetar në mbrojtje të dinjitetit të luftës çlirimtare dhe të vlerave mbi të cilat u ndërtua shteti i Kosovës.