Izraeli goditi një objektiv pranë pallatit presidencial në kryeqytetin sirian Damask, tha kryeministri izraelit Benjamin Netanyahu të premten në mëngjes, duke përsëritur vendosmërinë e tij për të mbrojtur anëtarët e komunitetit Druze.

Kjo është hera e dytë në dy ditët e fundit që Izraeli ka kryer sulme ndaj Sirisë, duke përmbushur një premtim për të mbrojtur grupin minoritar, i cili është përfshirë në përleshje sektare me grupet e armatosura sunite në fillim të kësaj jave.

Druzët i përkasin një feje që është degë e Islamit dhe kanë ndjekës në Siri, Liban dhe Izrael.

Sulmet pasqyrojnë mosbesimin e thellë të Izraelit ndaj islamistëve sunitë që rrëzuan Bashar al-Assadin në dhjetor, duke i komplikuar më tej përpjekjet e presidentit të përkohshëm Ahmed al-Shara për të rivendosur kontrollin mbi vendin.

“Izraeli sulmoi mbrëmë pranë pallatit presidencial në Damask”, tha Netanyahu në një deklaratë të përbashkët me Ministrin e Mbrojtjes, Israel Katz. “Ky është një mesazh i qartë për regjimin sirian: ne nuk do të lejojmë vendosjen e forcave në jug të Damaskut ose ndonjë kërcënim për komunitetin Druze.”

Ushtria izraelite tha në një deklaratë se sulmi u krye “pranë zonës së pallatit të Ahmed Hussein al-Shara në Damask”, pa specifikuar objektivin e saktë.

Autoritetet siriane nuk e kanë komentuar sulmin.

Burime siriane raportojnë se sulmi u krye rreth 500 metra larg pallatit presidencial dhe se Sharaa dhe zyrtarë të tjerë u larguan nga ndërtesa një orë më parë.

Që kur Assadi u rrëzua nga pushteti në dhjetor, Izraeli ka pushtuar territor në jugperëndim.

Sharaa, i cili më parë ishte komandant i al-Kaedës, por i ndërpreu lidhjet me grupin në vitin 2016, ka premtuar vazhdimisht se do ta sundojë Sirinë në një mënyrë gjithëpërfshirëse dhe duke i respektuar të drejtat e minoriteteve.

Megjithatë, incidentet e dhunës sektare, përfshirë vrasjen e qindra alavitëve në mars, kanë rritur frikën midis komuniteteve minoritare nga dominimi islamist.

Dhuna sektare e kësaj jave filloi të martën me përleshje midis grupeve të armatosura druze dhe sunite në zonën të banuar me shumicë druze të Jaramanit, të shkaktuara nga një regjistrim zëri që fyente Profetin Muhamed, për të cilin militantët sunitë dyshonin se ishte regjistruar nga një klerik fetar i komunitetit druz.

Më shumë se dhjetëra njerëz u raportuan të vrarë të martën, dhe dhuna u përhap më pas në qytetin me shumicë druze të Sahnayas në periferi të Damaskut të mërkurën.