Të paktën 60 palestinezë, përfshirë fëmijë, u vranë në një valë sulmesh izraelite në Gazë të martën në mbrëmje, ka njoftuar agjencia e Mbrojtjes Civile dhe spitalet e drejtuara nga Hamasi.

Izraeli kreu sulmet në përgjigje të asaj që e cilësoi si shkelje nga Hamasi të marrëveshjes së armëpushimit të ndërmjetësuar nga SHBA-ja.

Ministri i Mbrojtjes i Izraelit akuzoi Hamasin për një sulm në Gazën jugore që vrau një ushtar izraelit të martën dhe për shkelje të kushteve për kthimin e trupave të pengjeve të vdekura.

Hamasi pretendon se nuk kishte “asnjë lidhje” me sulmin dhe këmbënguli se është i përkushtuar ndaj marrëveshjes së armëpushimit.

Presidenti i ShBA-së, Donald Trump, deklaroi se “asgjë” nuk do të rrezikonte armëpushimin, por shtoi se Izraeli duhet të “kundërsulmojë” kur ushtarët e tij të jenë në shënjestër.

Sulmet izraelite goditën shtëpi, shkolla dhe blloqe banimi në Qytetin e Gazës dhe Beit Lahia në veri të Gazës, Bureij dhe Nuseirat në qendër, si dhe Khan Younis në jug, sipas dëshmitarëve dhe ndihmësve të parë.