Liria nuk âsht kurrë ma shumë se nji brez larg zhdukjes. Duhet me luftu për të, të mbrohet dhe t’u kalohet brezave pasues, për me bâ të njâjtën – Ronald Regan.

Halil Matoshi

1.

Kushtetuta e Kosovës âsht shumë e kjartë dhe e hapun, por mësymjet e Albin Kurtit janë të pakjarta – për vëzhguesit e huej – sepse janë të mshefta.

Kushtetuta e mbiquejtun ahtisaariane âsht liberale dhe balancuese e të drejtave, ajo  normon nji demokraci shumëetnike!

Kryengritja kundër saj, përfshi disa juristë e profesorë universtar (të shkollës enveriste)  âsht nacional-socializëm i pastër!

2.

Asht e çuditshme se Kushtetuta nuk po sulmohet nga pakica serbe, (Simić i Listës serbe nga foltorja e Kuvendit të Kosovës i drejtohej Bashës që të kishte kujdes, të mos e shkelte Kushtetutën!) porse ajo âsht nër “artilerinë” e rândë politike të shumicës shqiptare!?

Pse?

Sepse partia e Albin Kurtit mësyn ashiqarshëm që me mjete kuazi kushtetuese me e shkatrru Kushtetutën e Kosovës; me heqjen e Nenit 1 pika 3 të Kushtetutës dhe shumicën e dyfishtë, Neni 65 pika 2, tue i detronizu partitë e pakicës serbe, për me ua mohu serbëve etnik përfaqësimin, sepse, vetëm pa ta, Kurti âsht i bindun se munet me ndryshu Kushtetutën!?

Po munet, sepse në nacionalizmin e tina rigjid, nuk ka opozitë.

Mjerisht, në bllokun tjetër politik ka fare pak guxim dhe shumë nacionalizëm!

Pra ai, e ka futë në orbiten e tina tânë spektrin politik, që e shquen nacionalromantizmi dhe sentimenti antiserb.

Si nji thirrje historike, gjithnji del që liria e shprehjës pengon autokratët.

Kurti pothuejse ia ka dalë me e stigmatizu median e pavarun, tue i qitë gazetarët dhe opinionistat kritik në sy të qytetarëve, si leva dhe njerëz të Serbisë!

Madje, në këtë zezonë, nji i marrë në nji studio televizive, mes Prishtine i jepte zâ idesë fashiste që gazetarët aktualë të zavendësohen me “gazetarë patriotik”!?

3.

Nacionalizmi i nji subjekti politik si Lista Serbe, që âsht ushqy gjatë nga fashizmi i kreut shtetnor serbian, nuk duhet të jetë arsye që të suspendohet rendi kushtetues!

Ky nacionalizëm i pakicës munet ose me u moderu, përmes demokracisë ose me u frenu me masa ligjore, por jo me arbitraritet kushtetues dhe retorika vullnetariste e populliste!

Me retorikat aktuale të VVsë, në KQZ e Kuvend kombëtar, serbët homogjenizohen – në kohën kur Serbia âsht para luftës civile e autokrati i Beogradit, Vučić tue ra – kinse për mbrojtje nga cënimi i “mënyrës serbe te të jetuemit” dhe Lista Serbe rritet.

Ajo pas sulmit terrorist në Banjë, thuejse kishte metë pa kauzë!?

Dhe Kurti në këtë hoogjenizim të serbëve e sheh momentumin e tina për rritje.

Asht tregu i saktë lekcioni historik se nacionalizmat e ushqejnë njâni-tjetrin.

4.

Kosova âsht shtet sovran – që ka fitu pavarësinë në këmbim të garancive për pakicat – si të drejta shtesë – sidomos  për pakicën serbe, porse partitë shqiptare që janë në shumicë, veçmas partia në pushtet, Vetëvendosje – po i trajtojnë ato të drejta si pengesë për funksionimin dhe prosperitetin e shtetit, tue i luftu njashtu me nacionalizëm agresiv!?

Mosnjohja e të drejtave të negociueme e t’dhânuna serbëve si komunitet kosovar, në Procesin e Vjenës, në këmbim të pavarësisë kombëtare, âsht agresion mbi institucionet e shtetit.

5.

Kush ka pak dije nga historia, Kushtetuta e Weimarit (1933) akuzohej nga nji “grup profetik” se u kishte dhânë shumë të drejta pakicave, koministave, hebrejve dhe të huejve.

Sëkëndejmi – sa për identifikimin e anmqve – u vu në zbatim selektivisht Neni 48 i saj, që kufizonte lirinë e shprehjës.

E ajo që pasoi dihet.

6.

Kushtetuta e vitit 1974 e Kosovës, u sulmue nga Serbia, deri në suprimim me tankse, sepse u jepte “shumë të drejta shqiptarëve” si pakicë në ish shtetin federal!?

Si pikënisje merrej fakti se kjo pakicë po e pengonte funksionimin e shtetit serb.

A i kutohet sot dikujt dita kur Serbia e Milošević-it ndaloi RTPnë, “Rilindjën” dhe tânë shtypin shqip në Kosovë dhe arrestoi gazetarë?

Tjerat janë histori.