Aleanca për Ardhmërinë e Kosovës (AAK) ka kërkuar që të rishikohet buxheti i Kosovës dhe rritjen e pagave në sektorin publik.

Këto kërkesa kanë qenë temat kryesore të interpelancës në Kuvendin e Kosovës ndaj ministrit të Financave, Punës dhe Transfereve, Hekuran Murati.

Besnik Tahiri, shef i grupit parlamentar të AAK-së, ka kërkuar fillimin e menjëhershëm të procedurës për rishikimin e buxhetit për vitin 2023.

Arsyeja për këtë, sipas tij, është për shkak të dështimit të plotë të investimeve kapitale dhe ngritjes së koeficientit të pagës në sektorin publik.

“Menaxhimi i fondeve publike në këto dy vjetët e fundit nga qeveria e kryeministrit të Kosovës, Albin Kurti, ishte i dobët, joprofesional, partiak e politik, e mbi të gjitha ishte i dëmshëm për vendin”, ka thënë Tahiri.

Sipas tij, në vitin 2021 nga fondi i investimeve kapitale, të përcaktuara në buxhet në shumë prej 622 milionë eurosh, janë realizuar vetëm 419 milionë euro.

Ndërsa, për vitin 2022, sipas Tahirit, shuma për investime kapitale ka qenë 794 milionë euro, ndërsa janë realizuar vetëm 419 milionë euro.

“Me dinamikën që e kemi në këtë vit, mund të pritet që ekonomia të bie në një kolaps dhe dështim të plot. Për dy vjet qeverisje, Kosova dhe kjo qeveri nuk kanë arritur t’i shpenzojnë gjysmë miliard euro”, tha ai.

Aleanca për Ardhmërinë e Kosovës ka kërkuar që koeficienti i pagës me rishikim të buxhetit të bëhet nga 105 euro në 129 euro.

Në shkurt të këtij viti Kuvendi i Kosovës ka miratuar koeficientin e pagës.

Ndërsa ministri i Ministrisë së Financave, Punës dhe Transfereve, Hekuran Murati, i ka cilësuar të pavërteta deklarimet e deputetit Tahiri.

“Sa i përket mbështetjes së ekonomisë u tha që ka pasur humbje dhe mosalokim të investime kapitale. Sa i përket investimeve kapitale normalisht që paguhen faturat për punët që janë kryer, për projektet që nuk janë kryer punët ne nuk mund të paguajmë fatura”, ka thënë Murati.

Ai ka thënë se gjithnjë duke qëndruar brenda kornizës ligjore për vitin e ardhshëm koeficienti i pagës do të rritet në 110 euro.

“E konsideroj të panevojshme një seancë të tillë që kërkon të ndryshohet diçka për të cilën ne kemi shkuar në maksimum sa i përket vitit aktual”, është shprehur Murati.

Në anën tjetër, deputeti i Lidhjes Demokratike të Kosovës (LDK), Armend Zemaj, tha se koeficienti i pagës prej 105 eurosh nuk i është përgjigjur as normës së inflacionit, që sipas tij, shënoi rritje rekorde.

“Mos të harrojmë se sipas Bankës Botërore, inflacioni në vendin tonë arriti deri në 20 për qind, ndërsa për produktet bazike 50 për qind. Përkundër sugjerimeve dhe propozimeve të ofruara nga ne dhe nga ekspertëtm pushteti zgjodhi mos dëgjueshmërinë”, ka thënë ai.

Rishikimi i buxhetit bëhet zakonisht në gjysmëvjetorin e dytë të vitit, respektivisht në muajin qershor.

Ky rishikim ofron mundësi për transfere ndërmjet nën-programeve dhe organizatave buxhetore.

Organizatave buxhetore u lejohet të bëjnë rregullime të brendshme që janë të arsyeshme për të bërë ekzekutimin efikas të buxhetit për periudhën e mbetur të vitit buxhetor.