Presidenti turk, Rexhep Taip Erdogan, dhe homologu i tij rus, Vladimir Putin, do të fokusohen në marrëveshjen e grurit të Detit të Zi gjatë takimit të tyre të hënën, teksa Turqia kërkon të rikthejë Moskën në marrëveshje, ka thënë këshilltari kryesor i Erdoganit për politikën e jashtme.

“Ne luajmë një rol udhëheqës këtu. Ne shohim mbështetje të fortë nga e gjithë bota për realizimin e korridorit të grurit”.

“Statusi aktual (i marrëveshjes së grurit) do të diskutohet në samit të hënën. Ne jemi të kujdesshëm, por shpresojmë të arrijmë sukses sepse kjo është një situatë që prek të gjithë botën”, ka thënë në një intervistë në kanalin televiziv A Haber, shefi i politikës së jashtme dhe këshilltari i sigurisë i Erdoganit, Akif Çagatay Kiliç.

Dronët rusë kanë goditur infrastrukturën e portit të lumit Danub që është kritike për eksportet e grurit të Ukrainës, duke plagosur të paktën dy persona në pjesët jugore të rajonit të Odesa të dielën, thanë zyrtarët ukrainas.

Danubi është bërë rruga kryesore e Ukrainës për eksportimin e grurit që nga korriku, kur Rusia është larguar nga një marrëveshje e ndërmjetësuar nga OKB-ja dhe Turqia, e cila i kishte dhënë një kalim të sigurt eksporteve të Kievit të drithërave, farave vajore dhe vajrave bimore nëpërmjet Detit të Zi, shkruan “Reuters”.