Ndeshja e parë çerekfinales së Ligës së Evropës, Liverpool-Atalanta, luhet sot në “Anfield”, ndërsa Jurgen Klopp deklaron se fokusi i vetëm i “Reds”-ve është te kundërshtarët e tyre të Serisë A dhe jo perspektiva për të përfunduar karrierën e tij, duke fituar të vetmin trofe që ende nuk e ka ngritur si trajner i Liverpulit. Përpara takimit me skuadrën e Xhan Piero Gasperinit, Klopp diskutoi një larmi temash.

A do të jetë triumfi në Ligën e Evropës i veçantë, duke pasur parasysh se është i vetmi trofe që ende nuk keni fituar si trajner i Liverpulit?
Është disi një faturë e hapur. Që nga momenti kur pamë mundësinë për të hyrë në Ligën e Evropës, ne ishim vërtet të dëshpëruar për ta bërë këtë dhe ju e bëni këtë vetëm kur jeni Liverpuli, sepse dëshironi të fitoni kompeticionin. Por për këtë ju duhet të bëni të gjithë hapat e nevojshëm dhe padyshim që tani kanë mbetur vetëm ekipe të mëdha në garë dhe do të jetë e vështirë. E njohim forcën e Atalantës. Gasperini po bën një punë të pabesueshme atje për vite dhe është e vështirë të luash kundër ekipeve italiane. Gjithmonë ka qenë sepse ata janë taktikisht super të disiplinuar dhe super të rrezikshëm në shumë fusha, kështu që ne duhet të jemi në maksimumin tonë për të kaluar në raundin tjetër në këto dy ndeshje. Nuk po mendojmë për finalen apo diçka të tillë, duhet të jemi në maksimumin tonë.

Si i përgatisni këto ndeshje në një kalendar kaq të ngjeshur?
Vitin e kaluar nuk ishte e vështirë. Ne ishim jashtë Evropës shumë shpejt, por zakonisht ne kemi shkuar larg në garat evropiane, kështu që kjo është një procedurë normale për ne. Po, nuk ka shumë kohë për stërvitje, por ka shumë për takime, analiza video dhe gjëra të tilla. Të luash të enjten dhe pastaj të dielën është pak më e ndërlikuar, por ne jemi mësuar me këtë. Ky ritëm është ritmi normal për ne.

Si është të përballesh sërish me Atalantën, pas takimeve në Champions në 2020?
Kanë ndryshuar disa pozicione kyçe në fushë, por menaxheri është aty dhe kjo do të thotë se mënyra se si ata luajnë është mjaft konsistente dhe mënyra se si mbrojnë është gjithashtu e tillë. Por aftësitë e lojtarëve të ndryshëm e bëjnë atë të ndryshëm. Por ne presim një kundërshtar super të organizuar, një kundërshtar gjithashtu me përvojë. Do të jetë e vështirë për të dy.