Eliminimi i hershëm i Gjermanisë nga Kupa e Botës ka shtuar presionin mbi trajnerin Julian Nagelsmann, ndërsa Jurgen Klopp ka lënë të kuptohet se një ditë mund të marrë drejtimin e kombëtares gjermane.

Nagelsmann nuk dorëhiqet

Pas humbjes ndaj Paraguait në fazën e 1/16-ave, tifozët gjermanë kanë kërkuar largimin e Nagelsmannit, pasi kjo është hera e tretë radhazi që Gjermania nuk arrin të kalojë fazën e parë me eliminim direkt në një turne madhor.

Megjithatë, trajneri gjerman e bëri të qartë se nuk ka ndërmend të japë dorëheqjen.

“Nuk jam një njeri që largohet nga sfidat. Ka gjëra që duhet të ndryshojnë, por nëse Federata Gjermane dëshiron që të vazhdoj, unë do të vazhdoj”, deklaroi ai pas ndeshjes.

Ai shtoi se e njeh mirë botën e futbollit dhe është i vetëdijshëm se shumë njerëz kërkojnë largimin e tij, por dëshiron të vazhdojë punën.

Klopp nuk e përjashton mundësinë

Ndërkohë, Jurgen Klopp ka komentuar për herë të parë mundësinë e marrjes së drejtimit të kombëtares gjermane.

Ish-trajneri i Liverpoolit pranoi se emri i tij përmendet shpesh sa herë diskutohet posti i përzgjedhësit të Gjermanisë, por theksoi se aktualisht nuk është koha për të folur për këtë.

“Nuk kam menduar ende për atë rol. E kuptoj që emri im përmendet sa herë flitet për trajnerin e kombëtares, por nuk është momenti për të diskutuar. Kam një punë që më pëlqen shumë dhe, për aq sa di unë, nuk është një punë me kohë të pjesshme”, tha Klopp.

Vendimi i federatës mbetet vendimtar

Deri tani, Federata Gjermane e Futbollit nuk ka dhënë asnjë sinjal se planifikon ta shkarkojë Nagelsmannin.

Megjithatë, spekulimet për një ndryshim në stol pritet të shtohen në javët e ardhshme, veçanërisht nëse Klopp vendos të shfaqë interes konkret për drejtimin e kombëtares.

Aktualisht, Klopp mban postin e drejtorit global të futbollit në grupin Red Bull, i cili mbikëqyr disa klube, përfshirë RB Leipzig dhe Red Bull Salzburg.