Mbrojtësi i Kombëtares së Kosovës, Albian Hajdari, ka gjasa që karrierën ta vazhdojë në Superligën e Turqisë. Është bërë me dije se kandidati për president të Fenerbahçes, Aziz Yildirim, ka premtuar transferimin e Hajdarit nëse fiton zgjedhjet që mbahen më 7 qershor në klubin turk.

Siç kanë raportuar mediet në turke, Yildirim po bëhet gati për ta kontaktuar zyrtarisht skuadrën e Hoffenheimit për Hajdarin, i cili vlerësohet lart të klubi gjerman.

Ai te Fenerbahçe është duke u konsideruar si një investim afatgjatë për repartin e mbrojtjes dhe tashmë po monitorohet nga afër.

Hajdari ka kontratë me Hoffenheimin deri në verën e vitit 2031 dhe kartoni i tij vlerësohet të paktën 20 milionë euro.

23-vjeçari në verën e shkuar është transferuar tek Hoffenheimi nga Lugano dhe në sezonin e tij të parë në Bundesligë, Hajdari ka shënuar 1 gol dhe ka bërë 2 asistime në 30 paraqitje.

Ai gjithashtu ka edhe pesë paraqitje me Kombëtaren e Kosovës, ndërsa me “Dardanët” ka debutuar në muajin tetor të vitit të shkuar.