Drejtori i Aviacionit Civil të Kosovës, Driton Gjonbalaj, ka bërë me dije se kompania ajrore me të cilën janë deportuar gjashtë shtetasit turq kishte gënjyer institucionet e kosovare për qëllimin e fluturimit.

Gjonbalaj ka thënë se leja ishte kërkuar për fluturim komercial duke thënë se institucioni që ai drejton nuk është i përfshirë drejtpërsëdrejti në këtë proces.

“Ne e dimë se kërkesa për fluturim është bërë në Ministri të Infrastrukturës si fluturim komercial, kompania ka gënjyer për qëllimin e fluturimit”, ka deklaruar Gjonbalaj gjatë raportimit për vitin 2017 para Komisionit Parlamentar për Mbikëqyrjen e Financave Publike.

Po ashtu Gjonbalaj ka thënë se janë duke shikuar mundësinë e ndërmarrjes së masave ndaj kompanisë e cila ka bërë transportimin e gjashtë qytetarëve turq që jetonin në Kosovë të cilët janë deportuar me kërkesë të Turqisë, pasi akuzoheshin për pjesëmarrjen në tentim grushtshtetin e vitit 2016.

Gjonbalaj ka thënë se kompania “Birlesik Insaat” mund të përballet me një dënim deri në një milion euro.

Më 29 mars, me kërkesë të autoriteteve turke, Policia e Kosovës kishte arrestuar dhe dëbuar për në Turqi gjashtë qytetarë turq, pesë prej tyre punonjës në shkollën “Mehmet Akif”, ndërsa i dëbuari i gjashtë ishte mjek turk.

Për këtë deportim, presidenti, kryeministri dhe kryetari i Kuvendit të Kosovës patën deklaruar se nuk kanë qenë të informuar paraprakisht.

Autoritetet e sigurisë në Kosovë, i kishin deportuar ata nën arsyetimin se këta persona paraqesin rrezik për sigurinë kombëtare, fillimisht ua kishin revokuar të njëjtëve të drejtën e qëndrimit dhe më pas i kanë deportuar nga Kosova për në Turqi, në bashkëpunim me inteligjencën turke.

Pas deportimit të tyre, kryeministri i Kosovës, Ramush Haradinaj, kishte liruar nga ministrin e Brendshëm, Flamur Sefaj, dhe drejtorin e Agjencisë së Kosovës për Inteligjencë, Driton Gashi, në pozitën e të cilit pak javë më vonë u emëruar ish-drejtori i Policisë së Kosovës, Shpend Maxhuni.

Shkollat “Mehmet Akif” në Kosovë i përkasin Institucionit Arsimor Gulistan. Ky i fundit ka kopshte, institucione parashkollore, shkolla fillore dhe të mesme në gjithë Kosovën.