Komisioni Qendror i Zgjedhjeve (KQZ) në mbledhjen e radhës mori vendim për akreditimin e grupit të pestë me 169 vëzhgues për vëzhgimin e zgjedhjeve të parakohshme për Kuvendin e Republikës së Kosovës, të cilat do të mbahen më 28 dhjetor.

Besnik Buzhala, drejtori i Zyrës për Regjistrim, Certifikim dhe Kontrollin Financiar të Subjekteve Politike, ka prezantuar organizatat jo-qeveritare, mediat vendore dhe te huaja, për të cilat tha se i kanë plotësuar kriteret ligjore.

Në mbledhjet e kaluara, KQZ-ja ka akredituar edhe 19,085 vëzhgues të tjerë, të cilët përfaqësojnë: subjekte politike të certifikuara, organizata joqeveritare vendore, organizata ndërkombëtare, media vendore/ ndërkombëtare, institucione shtetërore dhe përfaqësi diplomatike.

Në të njëjtën mbledhje, KQZ-ja ka vendosur edhe për mosakreditimin e një organizate joqeveritare vendore dhe një organizate ndërkombëtare.

Buzhala ka theksuar se këtyre u refuzohet akreditimi i tyre me arsyetimin se nuk kanë përmbushur kriteret ligjore të parapara me Ligjin për Zgjedhjet. “Zyra për Regjistrim, Certifikim dhe Kontrollin Financiar të Subjekteve Politike (Zyra) gjatë vlerësimit të dokumentacionit, konstatuar se statuti e kësaj organizate (qëllimi dhe fushëveprimi) nuk ndërlidhet drejtpërdrejt me monitorimin e proceseve zgjedhore apo mbrojtjen e të drejtave të njeriut, ashtu siç kërkohet me nenin 54, paragrafi 1 të Ligjit Nr. 08/L-228 dhe për rrjedhojë, nuk janë përmbushur kriteret ligjore për akreditim si organizatë vëzhguese zgjedhore. Zyra për Regjistrim, Certifikim dhe Kontrollin Financiar të Subjekteve Politike (Zyra) gjatë vlerësimit të dokumentacionit, konstaton se dokumenti i ofruar edhe pse ka vulën dhe nënshkrimin, nuk dëshmon se nga cili institucion është lëshuar, me çka e bënë të dyshimtë vërtetësinë e këtij dokumenti, i cili po ashtu, nuk është dokument i plotë (ka mungesë të faqeve). Zyra i rekomandon KQZ, refuzimin e kërkesës për akreditim të “Odbor za kontrolu i opservaciju-OKO” për Zgjedhjet e Parakohshme për Kuvendin e Republikës së Kosovës, të cilat do të mbahen më 28 dhjetor 2025”, ka njoftuar Buzhala.