Krasniqi: Bashkëpunimi Kosovë-Shqipëri, i pa alternativë
Kryetari i PDK-së, Memli Krasniqi, ka pritur sot në takim presidentin e Shqipërisë, Ilir Meta, me të cilin ka diskutuar për thellimin e bashkëpunimit ndërmjet dy vendeve.
Pas takimit, në profilin e tij në “Facebook”, Krasniqi ka shkruar se PDK-ja e vlerëson si tepër të rëndësishëm forcimin e bashkëpunimit ndërmjet Kosovës dhe Shqipërisë.
Postimi i plotë i Krasniqit:
Në prag të festës tonë kombëtare, 28 nëntorit, sot në selinë e Partisë Demokratike të Kosovës, kisha kënaqësinë që bashkë me kolegë, të mirëpres Presidentin e Republikës së Shqipërisë, z. Ilir Meta.
Në këtë takim vëllazëror, me Presidentin Meta diskutuam për prioritetet dhe sfidat e dy shteteve tona, për thellimin e bashkëpunimit të ndërsjellë dhe për rrugën e përbashkët drejt integrimit evropian. Po ashtu, Presidenti Meta na uroi për mbarëvajtjen e procesit zgjedhor dhe për rezultatin e PDK-së në zgjedhjet komunale.
PDK e vlerëson si tepër të rëndësishëm e pa alternativë forcimin e bashkëpunimit ndërmjet Kosovës dhe Shqipërisë dhe si parti lidere e opozitës do të jap kontributin e saj në çdo formë e në çdo proces që ka këtë synim.