Kompania Rajonale e Ujësjellësit (KRU) “Prishtina” ka njoftuar se punimet për sanimin e gypit kryesor furnizues në lokacionin Shkabaj kanë përfunduar me sukses.

Sipas njoftimit zyrtar, intervenimi është realizuar falë angazhimit të ekipeve të kompanisë, ndërsa pas përfundimit të punimeve furnizimi me ujë ka nisur të rikthehet gradualisht.

Gjatë ditës së sotme pritet që furnizimi të normalizohet plotësisht në të gjitha zonat e prekura, përfshirë Fushë Kosovën, Obiliqin, lagjen Kalabria, si dhe zonat e tjera që mund të kenë pasur ndikime të përkohshme nga ndërprerja.

Nga KRU “Prishtina” kanë falënderuar konsumatorët për mirëkuptimin, durimin dhe bashkëpunimin gjatë kohës së realizimit të punimeve.

Në njoftim thuhet se ekipet kanë punuar intensivisht për të rikthyer sa më shpejt furnizimin normal me ujë për qytetarët.