Nën duartrokitje dhe brohoritje të emrit të tij nga mbështetësit, kryeministri i Polonisë, Donald Tusk, i ka mbijetuar votës së besimit në parlamentin polak.

Sipas raportimeve të medieve, deputetët kanë votuar 243 pro dhe 210 kundër qeverisë, pa asnjë abstenim.

Kujtojmë se Tusk e kërkoi këtë votë besimi pas humbjes së aleatit të tij politik në zgjedhjet e fundit presidenciale – një disfatë që e la të dobësuar dhe në nevojë për të riforcuar autoritetin e tij.

Para votimit, bëhet e ditur se Tusk i ka thënë parlamentit se nuk mund të “mbyllin sytë” ndaj realitetit se qeveria e tij përballet me “sfida më të mëdha”, për shkak të zgjedhjes së Karol Nawrockit si president, i mbështetur nga opozita e djathtë.

Dihet se në Poloni, presidenti ka të drejtën e vetos për ligjet, dhe Nawrocki, një konservator social që mbështet Donald Trumpin, kundërshton një Evropë federale si dhe pranimin e Ukrainës në NATO dhe BE. Ai pritet të vazhdojë të përdorë kompetencat presidenciale në mënyrë të ngjashme me paraardhësin e tij konservator, Andrzej Duda, gjatë 18 muajve të parë të mandatit të Tuskut.

Koalicioni i Tusk nuk ka mjaftueshëm vota për të përmbysur një veto presidenciale. Megjithatë, ky konfirmim i ri nga parlamenti i jep qeverisë së Tuskut një pozicion më të fortë, të paktën për momentin.

Tusk gjithashtu ka njoftuar më herët se do të ndërmarrë një riformatim të kabinetit në muajin korrik.