Kryeparlamentari Konjufca vendos rregulla të reja për kompensimin e deputetëve

22 prill 19:28

Kryeparlamentari Glauk Konjufca ka marrë vendim të ri se si do të paguhen deputetët për shpenzimet e tyre. Me këtë vendim, është përgjysmuar shuma që u jepej deputetëve për rrugën që e bënin për të shkuar në Kuvend.

Një prej ngjarjeve që ka pasur më së shumti reagime këtë vit ishte ajo e shpenzimeve të deputetëve, kur u mor vesh se sa para marrin çdo muaj nga kompensimi për udhëtim.

Vetëm pas zhurmës së madhe, deputetët e Grupit Parlamentar shumicë, Lëvizjes Vetëvendosje, që kryesonin listat e shpenzimeve, thanë se më nuk do të marrin para nga shteti për rrugë.

Kryeparlamentari Glauk Konjufca ka nënshkruar sot një vendim të ri për këtë punë, ku është rirregulluar çështja e shpenzimeve të deputetit.

Sipas vendimit të cilin e ka Gazeta Express, deputetëve për shpenzime ditore u ndahen nga pesë euro, kur marrin pjesë në seanca dhe në mbledhjet të komisioneve.

“Për shpenzime ditore të deputetit ndahen nga 5.00 euro në ditë për pjesëmarrjen në punimet e seancës plenare, në mbledhjen e komisionit parlamentar dhe në grup punues”.

Ndërsa, me këtë vendim është ndryshuar shuma që u kompensohet deputetëve, varësisht se çfarë udhe bëjnë deri në Kuvend.

“Kompensimi për shpenzimet e udhëtimit të deputetit, për pjesëmarrje në punimet e seancës plenare, në mbledhjen e komisionit parlamentar dhe në grup punues, caktohet si vijon: prej 15 km deri në 30 km – 5 euro, deri në 60 km – 10 euro dhe mbi 60 km – 15 euro”.

Shpenzimet maksimale të udhëtimit që një deputeti mund t’i mbulohen, sipas këtij vendimi, janë 150 euro.

Sipas një sqarimi të Kuvendit në shkurt të këtij vitit, që nga 2011-a, deputetët paguheshin dyfish më shumë sesa vendimi i sotëm i Konjufcës.

“Deputeti kompensohet për shpenzimet e udhëtimit si në vijim: deri në 30 km – 10 euro, deri në 60 km – 20 euro dhe mbi 60 km – 30 euro, për pjesëmarrje në punimet e seancës plenare dhe në komisione”, thuhej në sqarim.

Pasi në media ishin publikuar shpenzimet e disa deputetëve që i kanë bërë në muajt e fundit të vitit 2021, Kuvendi publikoi listën e plotë e të gjitha kompensimeve për rrugë që u janë bërë deputetëve në 10 vitet e fundit.

Lajme të sponsorizuara

Të fundit
Presidentja e Kosovës, Vjosa Osmani, ka kërkuar nga Ministria e…