Shqipëria ka ftuar Bullgarinë të bashkohet me aleancën ushtarake trepalëshe, e cila përfshin edhe Kroacinë dhe Kosovën. Kjo iniciativë nuk bie ndesh me parimet e NATO-s. Kryetarja e Kuvendit të Shqipërisë, Elisa Spiropali, në një intervistë për agjencinë e lajmeve në Bullgari “BGNES” ka folur edhe nëse iniciativa “Bota Serbe” përbën një problem sigurie për Shqipërinë dhe Ballkanin.

“Lidhur me iniciativën ‘Bota Serbe’ të presidentit Aleksandër Vuçiq, dua të deklaroj se çdo hap që shikon prapa, mbështetet në retorikën e së kaluarës që mund të jetë shqetësuese dhe tingëllon shqetësuese si për Kosovën ashtu edhe për Shqipërinë. Është në interesin tonë të arrijmë përparim në negociatat dypalëshe për njohje reciproke midis Serbisë dhe Kosovës, si dhe përparim dhe hapje të rrugës që Kosova të ecë përpara, të ruajë paqen në Ballkan dhe të sigurojë stabilitetin në rajon dhe më gjerë”, ka thënë Spiropali.

Ajo ka deklaruar se Tirana dëshiron të ndihmojë Prishtinën të bëhet anëtare e NATO-s dhe të integrohet më shpejt në aleancë, si dhe në disa organizata të tjera ndërkombëtare.

Kryetarja e Kuvendit të Shqipërisë ka folur edhe për aleancën trepalëshe të lidhur së fundmi midis Shqipërisë, Kroacisë dhe Kosovës.

Kur është pyetur nga “BGNES” për rëndësinë e saj për sigurinë në rajon, Elisa Spiropali ka vënë në dukje se NATO si organizatë parashikon në statutin e saj ekzistencën e iniciativave rajonale në formate të tilla si ai që u zgjodh në këtë rast. “Kjo nuk është kundër dikujt, por për diçka”, ka thënë ajo.

Elisa Spiropali ka deklaruar se kjo iniciativë trepalëshe nuk është pikërisht trepalëshe. “Ne e ftojmë Bullgarinë të bashkohet, si dhe çdo vend tjetër që ndan të njëjtat vlera dhe shikon në të njëjtin drejtim”, ka thënë Spiropali.