Kadri Kryeziu, ish-nënkryetar i Gjykatës Kushtetuese ka reaguar pasi Presidentja i ka dërguar kërkesë kësaj Kushtetueses në lidhje me ngërçin institucional të krijuar në vend.

Kryeziu tha se janë dy aspekte që e shqetësojnë në kërkesën e Osmanit.

Ai tha se kërkesa do të duhej të nisej shumë më herët nga Osmani dhe se nuk bën sens që presidentja të pres ditët e fundit.

“1. Kërkesa për sqarime është dashur të niset shumë më herët. Nuk bën sens që Presidenti i Republikës të pres ditët e fundit, për ta bërë pyetjen që po e mundon një Kosovë të tërë. Kjo e lë shijen e keqe sikur edhe Presidentja ka taktizuar politikisht. 2. Presidentja Osmani, në kërkesën e dërguar në Kushtetuese, që ka të bëjë me zgjidhjen e konfliktit të kompetencave, ka paraqitur edhe kërkesën për masë të përkohshme për pezullimin e afatit 30-ditor të Kushtetutës” shkruan Kryeziu.

Ndërsa kërkesën e Osmanit për masë të përkohshme për pezullim të afatit 30-ditor, Kryeziu, e cilëson absurde, gabim dhe që nuk është në frymën e detyrës për të mbrojtur funksionimin kushtetues të institucioneve.

“Gjykata Kushtetuese nuk e ka nxjerr afatin 30 ditor nga mendja, pra nuk e ka shpikur atë. Afati 30 ditor buron nga neni 66 i Kushtetutës, rrjedhimisht Gjykata Kushtetuese nuk ka asnjë autoritet ta pezullojë një gjë që del nga Kushtetuta. Është vërtet e habitshme, pse Presidentja e ka bërë këtë kërkesë” shkruan Kryeziu në reagimin e tij raporton “Gazeta Blic”.

Reagimi i plotë:

Shqetësimet e mia me shkresën e Presidentes Osmani drejtuar Gjykatës Kushtetuese.

Presidentja Osmani i është drejtuar Gjykatës Kushtetuese për sqarime rreth pasojave juridike nëse nuk respektohet afati 30 ditor për konstituimin e Kuvendit.

Janë dy aspekte që më shqetësojnë:

1. Kërkesa për sqarime është dashur të niset shumë më herët. Nuk bën sens që Presidenti i Republikës të pres ditët e fundit, për ta bërë pyetjen që po e mundon një Kosovë të tërë. Kjo e lë shijen e keqe sikur edhe Presidentja ka taktizuar politikisht.

2. Presidentja Osmani, në kërkesën e dërguar në Kushtetuese, që ka të bëjë me zgjidhjen e konfliktit të kompetencave, ka paraqitur edhe kërkesën për masë të përkohshme për pezullimin e afatit 30-ditor të Kushtetutës.

“Kërkesa për masë të përkohshme është mundësi që të shmanget futja e institucioneve në një bllokadë pa fund, dhe hyrja në një situatë ku institucionet do të mund të konstituoheshin në një mënyrë jokzushtetuese dhe do të ishin të pasafatshme”, raportohet të ketë thënë ajo.

Kjo kërkesë është gabim, ësht absurd, dhe as nuk është në frymën e detyrës për të mbrojtur funksionimin kushtetues të institucioneve.

Gjykata Kushtetuese nuk e ka nxjerr afatin 30 ditor nga mendja, pra nuk e ka shpikur atë. Afati 30 ditor buron nga neni 66 i Kushtetutës, rrjedhimisht Gjykata Kushtetuese nuk ka asnjë autoritet ta pezullojë një gjë që del nga Kushtetuta. Është vërtet e habitshme, pse Presidentja e ka bërë këtë kërkesë.