Kurti: Adem Demaçi i dha emër ndërkombëtarisht UÇK-së

13 gusht 18:37

Lideri i Lëvizjës Vetëvendosje, Albin Kurti ka bërë me dije se 22 vite më parë Adem Demaçi mori detyrën e përfaqësuesit politik të UÇK-së.

Derisa ka bërë homazhe në vendin ku Demaçi mori këtë detyrë, Kurti ka vlerësuar Adem Demaçi i dha emër ndërkombëtarisht UÇK-së.

“Adem Demaçi i dha emër ndërkombëtarisht UÇK-së. Ai ishte i vlerësuar me çmimin prestigjioz evropian Sakharov, dhe ishte fytyra e gjallë politike e padrejtësive serbe ndaj shqiptarëve. Ndërsa UÇK-ja i dha Adem Demaçit substancë. Ajo ishte realizim i vonë i përpjekjes së tij të kahershme”, ka shkruar Kurti në profilin e tij në “Facebook”.

 

Postimi i plotë i Kurtit:

 

22 vite më parë Adem Demaçi mori detyrën e përfaqësuesit politik të UÇK-së.

Idealisti i moçëm, i cili kishte kaluar tre dekada në burgjet e pushtuesve të kombit të tij, u bashkua me idealistët e rinj, që kishin nisur luftën e armatosur për çlirim. Ideali ishte i njëjti, ai i bashkimit të shqiptarëve, jo për të dalë mbi të tjerët, por për t’u bërë të barabartë me ta. Jo për hakmarrje, por për drejtësi. Jo për inat, por për t’i hapur rrugë bashkëpunimit mes popujve fqinjë. Nuk ka paqe e zhvillim të Ballkanit nëse popujt nuk ia njohin lirinë e barazinë njëri-tjetrit.

Adem Demaçi i dha emër ndërkombëtarisht UÇK-së. Ai ishte i vlerësuar me çmimin prestigjioz evropian Sakharov, dhe ishte fytyra e gjallë politike e padrejtësive serbe ndaj shqiptarëve. Ndërsa UÇK-ja i dha Adem Demaçit substancë. Ajo ishte realizim i vonë i përpjekjes së tij të kahershme.

Me mish e me shpirt Adem Demaçi punoi, hapi zyrën në Prishtinë pa u trembur nga okupatorët mizor, dhe nuk u ndal as në ditën më të zezë. Ai nuk trembej, se punonte me drejtësi.

Do t’i kujtoj gjithnjë si të pandarë bacën Adem dhe UÇK-në, sepse përpjekja e popullit tonë për liri, qoftë në ilegalen para luftës apo me armë në dorë gjatë luftës, janë frymëzim për një politikë që nuk shitet e nuk blihet, që nuk koritet e çnderohet, as sot e as nesër. Por që punon pa u ndalur, me vetësakrifikim, për realizimin e projekteve e premtimeve, për avancimin tonë kolektiv, për drejtësinë e lirinë, zhvillimin e paqen.

Image may contain: one or more people and outdoor

Image may contain: outdoor

Lajme të sponsorizuara

Të fundit
14.08.2020 Punime të domosdoshme për sigurinë e  sistemit Prishtinë 1.…