Është inauguruar të premten parku i erës “Selac Windpark” në fshatrat e Mitrovicës, Selac dhe Bajgorë. Inaugurimi i këtij projekti është vlerësuar si një investim strategjik.

Të pranishëm në ceremoninë inauguruese ishin kryeministri Albin Kurti dhe ministrja e Jashtme e Gjermanisë, Annalena Baerbock.

Më këtë rast, Kurti ka thënë se me këtë investim Kosova ndërmerr hapin e parë të madh drejt një të ardhmeje më të qëndrueshme dhe të larmishme të furnizimit me energji të rinovueshme.

“Agjenda e Gjelbër është një nga prioritetet e qeverisë sonë, jo vetëm sepse ajo përfshinë një aspekt të rëndësishëm të procesit tonë të integrimit në BE, por veçanërisht sepse ne kemi nevojë të heqim gradualisht qymyrin duke ruajtur pavarësinë tonë energjetike”, ka thënë kryeministri Kurti.

Teksa i ka përmendur aspektet pse është i rëndësishëm ky investim, i cili do të mbulojë 10 për qind  të kapacitetit të instaluar të vendit tonë, do të ulë emetimet e CO2 dhe po ashtu do të kontribuojë në furnizimin e përgjithshëm me energji, kryeministri Kurti ka thënë se është e qartë që në afat të gjatë zgjidhja e vetme e qëndrueshme është investimi në burimet e ripërtërishme.

“Shfrytëzoj rastin të falënderoj ‘SoWi Kosovo’ dhe z. Cornelius i cili përfaqëson kompaninë sot këtu. Falënderoj gjithashtu aksionerët e saj, Enlight Renewable Energy, Ilir Grapci dhe Christian Hammeke. Gjithashtu, Banka Evropiane për Rindërtim dhe Zhvillim për financimin e këtij projekti të sektorit privat, i cili është më i madhi që kanë financuar deri më tani në Kosovë. Zonja ministre Baerbock, vizita dhe përkushtimi juaj për zhvillimin e Kosovës vlerësohet shumë”, ka thënë Kurti.