Kryeministri i Kosovës dhe lideri i Vetëvendosjes, Albin Kurti, pas takimit me kreun e LDK-së, Lumir Abdixhiku, për çështjen e presidentit, ka thënë se do përpiqet që të ketë një takim edhe me kryetarin e PDK-së, Bedri Hamza.

“Do të përpiqem që të takohem edhe me kryetarin e PDK-së, Bedri Hamza, për shkak se presidenti nuk do të jetë jo vetëm i një partie, por presidenti është shprehje e unitetit të popullit”, ka thënë Kurti para medieve.

I pyetur nga gazetarët nëse do ta respektojë kërkesën e PDK-së që presidenti të jetë propozim nga kjo parti, Kurti ka thënë: “PDK-ja asnjëherë nuk ka nxjerrë asnjë emër përpara, ajo vetëm ka kërkuar që ne t’i besojmë në mënyrë absolute dhe të verbër. Pra absolute që dy kandidatët të jenë të PDK-së dhe të verbër që të mos na tregojnë emrin paraprakisht…”.

“Nuk mund të ketë marrëveshje pa ia thënë asnjëherë askujt asnjë emër”.