Kryeministri në detyrë, Albin Kurti, i ka dalë sot në mbrojtje kryetarit të Kuvendit të Kosovës, Dimal Basha, për artikullin kundër UÇK-së.

Kurti ka thënë se Dimal Basha e ka dhënë sqarimin për atë publikim, duke theksuar se kapitulli që ka shkruar ai nuk ka asgjë të bëjë me UÇK-në.

Ai ka thënë se problemi që kemi sot në Kosovë nuk e kemi nga një deformim dhe keqinterpretim i një artikulli me bashkautorësi, por sipas tij, ato janë më të mëdha; si nënshkrimi Zajednicës në 2013-n, amnistimi i kriminelëve serbë në veri, votimi i Gjykatës Speciale…, raporton “Epoka e re”.

“Kryetari i Kuvendit Dimal Basha e ka dhënë sqarimin për atë publikim që është bërë para se më shumë se një dekade dhe aty e ka sqaruar se kapitulli apo kreu që ka shkruar ai nuk ka asgjë të bëjë me UÇK-në. Ju e keni parë edhe fjalimin e tij pas zgjedhjes, ku ka shprehur vlerësimet me të larta për këtë vlerë të shenjtë të kombit shqiptar. Besoj se problemi që kemi sot në Kosovë nuk e kemi nga një deformim dhe keqinterpretim i një artikulli me bashkautorësi, ku ky nuk është autor i atij kapitulli të para më shumë se të një dekade. Problemet i kemi kur është nënshkruar Zajednica në 2013-n, problemet i kemi kur janë amnistuar kriminelët serbë në veri po ashtu në 2013-n, problemet i kemi kur është votuar Gjykata Speciale në 2015-n, problemet i kemi kur është themeluar Lista Serbe në bashkëpunim me Beogradin në vitin 2013, problemet i kemi kur politikanët e Kosovës kanë bërë qeveri duke u varur nga Lista Serbe, problemet i kemi kur kanë hyrë në pazare për ndarje të Kosovës, e jo të ky farë artikulli ku manipulohet me një kapitull, në të cilin ky fare nuk ka autorësi”, ka thënë Kurti.