Një ditë pas dështimit për t’u ribërë kryeministër, lideri i Vetëvendosjes, Albin Kurti nga qeveria në një konferencë për medie, ka thënë se nuk ka arritur ta bëjnë qeverinë edhe përkundër përpjekjeve të tij.

“Kuvendi nuk arriti të zgjedh qeveri të re, përkundër tentimeve te disahershme shteruese dhe gatishmërisë tonë të hapur e të sinqertë… Përpjekjet për ndërtimin e një shumice nuk e dhanë rezultatin të cilin e synuam.    Asnjëra nga partitë të cilave u kemi bërë ftesë, nuk ka pranuar të bëjë marrëveshje për bashkëqeverisje. I bëmë ftesë dy herë LDK-së, dhe kemi qenë në kontakt të vazhdueshëm me Nismën. LDK refuzon kategorikisht një qeveri të udhëhequr nga unë, kurse Nisma nuk deshi të jetë në një qeveri që e drejtoj unë”, ka thënë Kurti.

Ndryshe, më 26 tetor, Kurti nuk ka arritur t’i sigurojë 61 votat e nevojshme për nisjen e një mandati të ri në pushtet, pasi mori 56 vota për.

Tashmë i takon presidentes së vendit, Vjosa Osmani që të vendosë për hapat e mëtejmë.