Xabi Alonso do ta pranonte një ofertë nga Liverpooli për të zëvendësuar Arne Slot vetëm nëse klubi i garanton tre përforcime, sipas raportimeve nga Spanja.

Slot është nën presion të madh në “Anfield”, pasi një barazim në shtëpi ndaj Tottenham Hotspurit, që lufton për mbijetesë, bëri që tifozët të reagojnë me fishkëllima.

Trajneri holandez ende nuk ka rinovuar kontratën, pavarësisht se e udhëhoqi Liverpoolin drejt titullit në Premierligë në sezonin e tij të parë. Me nisjen e sezonit të ri, ai do të ketë më pak se 12 muaj në kontratë.

Ndërkohë, Alonso shihet si kandidati ideal për ta zëvendësuar. Ai nuk është rikthyer në trajnim që nga largimi i tij nga Real Madridi, pasi më herët kishte qenë edhe në listën e Liverpoolit për të zëvendësuar Jurgen Kloppin, por zgjodhi rrugën drejt “Bernabeut” pas largimit nga Bayer Leverkusen.

Sipas raportimeve, interesi i Liverpoolit për të nuk ka përfunduar, por Alonso kërkon të bindet plotësisht nga projekti sportiv. Ai thuhet se do të kërkojë tre transferime për të marrë drejtimin e skuadrës.

Mbrojtja është prioritet, pasi Ibrahima Konate ende nuk ka rinovuar, ndërsa Virgil van Dijk po i afrohet fundit të karrierës. Liverpool ka siguruar tashmë talentin francez Jeremy Jacquet nga Rennes, por Alonso e sheh Alessandro Bastoni të Interit si zëvendësimin ideal afatgjatë për Van Dijk.

Edhe mesfusha ka nevojë për përforcime. Alexis Mac Allister nuk ka arritur nivelin e sezonit të kaluar, ndërsa Ryan Gravenberch ka rinovuar kontratën. Alonso dëshiron Adam Wharton nga Crystal Palace si partner ideal në mesfushë.

Në sulm, objektivi është Bradley Barcola i Paris Saint-Germain. Forma e Mohamed Salah ka rënë këtë sezon, ndërsa Cody Gakpo nuk ka bindur pas largimit të Luis Diaz drejt Bayern Munich. Sulmi i Liverpoolit ka qenë i zbehtë, me përjashtim të Hugo Ekitike.

Nëse këto tre transferime realizohen, Alonso është i gatshëm të marrë drejtimin e skuadrës.

Megjithatë, pas investimeve të mëdha verën e kaluar për Alexander Isak dhe Florian Wirtz, është e vështirë të pritet një tjetër merkato e shtrenjtë nga “Fenway Sports Group” – sidomos nëse Liverpooli nuk arrin të sigurojë pjesëmarrjen në Ligën e Kampionëve.

Mbetet për t’u parë nëse drejtuesit do t’i qëndrojnë besnikë Slotit apo do të vendosin për një ndryshim me një trajner të ri si Alonso.