Shkëndija e Tetovës sot luan njërën nga ndeshjet më të rëndësishme të këtij sezoni – sfidën e parë të rrethit të tretë kualifikues në Ligën e Kampionëve.

Kampionët e Maqedonisë së Veriut do të përballen me Qarabagun e Azerbajxhanit, në stadiumin “Todor Proeski” në Shkup, me fillim nga ora 20:00.

Në prag të kësaj përballjeje, pronari i klubit kuqezi, z. Lazim Destani, ka drejtuar një mesazh emocional dhe një thirrje të veçantë për tifozët, duke u përqendruar jo vetëm në përkrahjen maksimale për skuadrën, por edhe në sjelljen sportive gjatë gjithë ndeshjes.

“Si tifoz i Shkëndijës, ju bëj thirrje që sot të tregojmë kulturën tonë sportive dhe të mos biem pre e provokimeve. Të mos lejojmë gjuhë urrejtjeje të asnjë forme, sepse këto nuk na përkasin dhe nuk e përfaqësojnë kulturën tonë,” thekson Destani në mesazhin e tij publik.

Ai shpreh krenarinë për ecurinë e deritanishme të klubit, duke shtuar se ëndrra vazhdon dhe objektivi është suksesi në Ligën e Kampioneve. Destani fton tifozët të mbushin tribunat dhe të japin përkrahje të pakushtëzuar për futbollistët dhe stafin, por gjithmonë në mënyrë dinjitoze.

“Ne, publiku dhe tifozët e Shkëndijës, si lojtari i 12-të, jemi shembull duke treguar nivelin tonë të lartë dhe duke e përfaqësuar me dinjitet dashurinë tonë për klubin,” vijon ai.

Ndërkohë, atmosfera në kampin kuqezi është pozitive, dhe skuadra e trajnerit Jeton Beqiri është e përqendruar maksimalisht për ta nisur me rezultat pozitiv këtë duel të vështirë ndaj një kundërshtari me përvojë të gjatë në garat evropiane.