Grupi parlamentar i Lidhjes Demokratike të Kosovës (LDK) ka mbajtur tryezë me temën: “Projekt-buxheti i Republikës sё Kosovës pёr vitin 2024”, në të cilën është kritikuar qeveria Kurti.

Deputetët e LDK-së, Avdullah Hoti, Arben Gashi dhe Hykmete Bajrami, kanë shprehur kritikat e tyre për buxhetin e vitit 2024.

Hoti ka thënë se buxheti ka shkuar në subvencione dhe se rritja e koeficientit të pagave nuk është rritje reale.

“Këtë buxhet duhet ta analizojmë. Masivisht ka shkuar në subvencione. Një vit normal siç kemi qenë ne, 36 për qind është shpenzuar në investime kapitale, ndërsa tani kemi rritje të subvencioneve. Rritja e koeficientit prej 5 euro nga 105 në 110 euro nuk përbën rritje reale. Vlerësimet tona janë se kjo rritje është më e vogël se sa rritja e inflacionit”, ka thënë Hoti.

Ndërsa deputeti Arben Gashi, ka thënë se mungojnë projektet zhvillimore në buxhetin e vitit 2024.

“Mungojnë projektet zhvillimore dhe ideja se si të qeveriset vendi. Jemi në vitin e fundit të kësaj qeverie dhe nuk kemi asnjë projekt madhor zhvillimor, kryesisht është marrë me çështje sociale”, ka thënë Gashi, raporton “EO”.

Kurse deputetja Hykmete Bajrami, ka kritikuar qeverinë për ndarjen e mjeteve financiare për komuna.