Shorti për 1/8 e finales, çerekfinalet dhe gjysmëfinalet e UEFA Champions League zhvillohet këtë mëngjes në Nyon të Zvicrës, duke zbuluar rrugën që do të ndjekin skuadrat drejt finales së 30 majit 2026 në Budapest.

Pas ndeshjeve “play-off” në mesjavë, tetë skuadra të tjera siguruan kalimin në 1/8 e finales, duke iu bashkuar tetë më të mirave të fazës së ligës. Nga Anglia, kualifikimin direkt e kishin siguruar Arsenal, Liverpool, Tottenham Hotspur, Chelsea dhe Manchester City, ndërsa Newcastle United iu bashkua fazës nokaut përmes “play-off”-it.

Si funksionon shorti?

Skuadrat janë ndarë në çifte të renditura sipas pozicionit në fazën e ligës, duke krijuar grupe të vogla me kundërshtarë të mundshëm. Në këtë edicion, skuadrat nga i njëjti kampionat mund të përballen mes vete që në 1/8 e finales.

Shembull: Arsenali (vendi i parë) ose Bayern Munich (vendi i dytë) do të përballen me njërën nga Bayer Leverkusen ose Atalanta, të cilat kaluan “play-off”-in pasi eliminuan respektivisht Olympiacos dhe Borussia Dortmund.

Përballjet e mundshme në 1/8 e finales

• Barcelona dhe Chelsea
  – kundër njërës nga: Paris Saint-Germain ose Newcastle United
• Liverpool dhe Tottenham Hotspur
  – kundër njërës nga: Atletico Madrid ose Galatasaray
• Sporting CP dhe Manchester City
  – kundër njërës nga: Bodo/Glimt ose Real Madrid
• Arsenal dhe Bayern Munich
  – kundër njërës nga: Atalanta ose Bayer Leverkusen

Kur zhvillohet shorti?

Shorti nis në orën 11:00 GMT (12:00 me kohën lokale në Nyon) dhe transmetohet drejtpërdrejt në faqen zyrtare të UEFA-s, në YouTube dhe në aplikacionin zyrtar të kompeticionit.

Datat e fazës eliminatore

1/8 e finales: 10/11 dhe 17/18 mars 2026
Çerekfinalet: 7/8 dhe 14/15 prill 2026
Gjysmëfinalet: 28/29 prill dhe 5/6 maj 2026
Finalja: 30 maj 2026 – Budapest

Faza vendimtare e sezonit europian po afron, me mundësi për superpërballje mes gjigantëve dhe derbi të nxehta që mund të përcaktojnë fatin e trofeut më prestigjioz për klube në Europë.