Liverpooli ka zhvilluar bisedime të avancuara me Bayer Leverkusen për të arritur një marrëveshje në lidhje me transferimin e Jeremie Frimpong nga Bundesliga në Premier League sezonin e ardhshëm.

Lajmi është konfirmuar nga “Sky sports”, që raporton se 24-vjeçari është një nga opsionet kryesore për të zëvendësuar Trent Alexander-Arnold, që do të largohet nga “Reds” për të shkuar në Madrid.

Për këtë arsye, drejtuesit e “Reds” po ndjekin seriozisht Frimpong.

Pretendohet se holandezi po planifikon gjithashtu të largohet nga Leverkusen këtë verë dhe ai ka një klauzolë lirimi prej 35-40 milionë eurosh.

Frimpong e ndihmoi Leverkusen të fitonte titullin kampion dhe Kupën sezonin e kaluar, ndërkohë që më herët ka triumfuar edhe në Skoci me Celtic.

Me fanellën e Bayer Leverkusen, lojtari ka shënuar 30 gola dhe ka dhënë 44 asistime në 190 ndeshje zyrtare.