Kancelari gjerman Friedrich Merz deklaroi të dielën se është i përgatitur që lufta në Ukrainë të zgjasë shumë, duke argumentuar se “luftërat zakonisht përfundojnë me disfatë ushtarake ose lodhje ekonomike”, por që ai nuk i sheh këto skenarë në horizont – as për Kievin, as për Moskën.

Komentet e tij u bënë në një intervistë për transmetuesin publik ZDF, vetëm një ditë para skadimit të afatit të caktuar nga presidenti i SHBA-së, Donald Trump, për një takim midis presidentëve të Rusisë dhe Ukrainës me synimin për të hapur rrugën drejt bisedimeve të paqes.

Trump ka kërcënuar me “pasoja” nëse ky takim nuk zhvillohet.

Merz dhe presidenti francez Emmanuel Macron kanë theksuar se faji për luftën i përket presidentit rus Vladimir Putin dhe i kanë bërë thirrje SHBA-së të vendosë sanksione më të ashpra ndaj Moskës.

“Unë po përgatitem nga brenda që kjo luftë të zgjasë shumë,” tha Merz në intervistën për ZDF, duke theksuar se përpjekjet diplomatike po vazhdojnë me intensitet për t’i dhënë fund luftës, por jo “me çmimin e kapitullimit të Ukrainës”.

“Sepse Rusia thjesht do të synonte një vend tjetër. Dhe pastaj pasnesër do të jemi ne,” shtoi Merz. “Kjo nuk është një mundësi.”

Ai refuzoi të komentojë mbi mundësinë që Gjermania të dërgojë trupa në Ukrainë si pjesë e një marrëveshjeje të mundshme paqeje. Aktualisht, Britania dhe Franca po udhëheqin një propozim për krijimin e një “force sigurie” për të penguar agresionin rus në të ardhmen, por përfshirja e Gjermanisë në këtë iniciativë ka ngjallur debat për shkak të së kaluarës së saj historike.

Ndërkohë, Kremlini reagoi të dielën duke akuzuar fuqitë evropiane për pengimin e përpjekjeve të Trump për paqe dhe përsëriti se Rusia do ta vazhdojë operacionin në Ukrainë deri sa të shfaqen “shenja reale se Kievi është gati për paqe”.