Analisti politik Shkëlzen Maliqi ka reaguar pas publikimit të përditësuar të rezultateve nga Komisioni Qendror i Zgjedhjeve për komunën e Mitrovicës së Jugut, ku janë numëruar 87.6% të votave. Sipas tij, diferenca aktuale në favor të kandidatit të PDK-së, Arian Tahiri, krahasuar me rezultatin preliminar të shpallur më 15 tetor, është e konsiderueshme dhe përforcon besueshmërinë e Exit Poll-eve që fillimisht u kontestuan.

“Tahiri është në epërsi me 777 vota ose rreth 3.4%, që është një dallim i madh dhe shumë vështirë ulet në 12% të votave që ende nuk janë numëruar apo janë në proces rikontrollimi”, thekson Maliqi në një reagim publik.

Ai thotë se mund të ketë vendvotime ku kandidati i Vetëvendosjes, Faton Peci, ka marrë vota të koncentruara, që teorikisht mund të ndikojnë në rezultat, por kjo gjithashtu ngre edhe dyshime.

“Ka gjasa që në një ose disa vendvotime kandidati i VV-së i ka marrë vota të koncentruara, që nuk përjashtohet si mundësi, por njëkohësisht mund të shërbejë edhe si element dyshimi për parregullsi dhe mashtrim që duhet të hetohen,” shton Maliqi.