Shkruan: Hisen Berisha

Deklarata e fundit e Albin Kurtit, se “problemet sot i kemi prej vendimeve të qeverive të kaluara”, është një absurditet politik, edhe tendencë për të vazhduar me të njëjtën retorikë e kurs mashtrimi.
Pikërisht me një gjuhë të tillë propagande ai erdhi në pushtet, duke akuzuar të tjerët dhe duke u paraqitur si shpëtimtar.
Sot, pas më shumë se pesë viteve qeverisje, tetor 2019 – 2025, me të njëjtën retorikë propagandistike po tenton të mbuloj dështimet e qeverive Kurti 1 dhe Kurti 2. Por edhe abuzimet me buxhetin e vitit 2025 si qeveri në detyrë.

Të gjitha këto vite qeverisje kanë një përkufizim: dështime sociale, ekonomike, zhvillimore, politike, të sigurisë dhe shpërbërje e shpresës.

Në planin social, qeverisja e Kurtit ka prodhuar zhgënjim dhe polarizim. Papunësia vazhdon të mbetet e lartë, si rezultat i pashpresës, mijëra të rinj po e braktisin vendin çdo vit, ndërsa premtimet për mirëqenie sociale, drejtësi dhe shance të barabarta janë shndërruar në slogane boshe mashtrimi. Në vend të politikave për të ndalur eksodin, Kurti ka ofruar vetëm retorikë populiste.

Një tjetër përkufizim që i atribuohet kësaj periudhe qeverisëse është stagnimi ekonomik dhe mungesa e zhvillimit në çdo sektor.
Ekonomia e Kosovës nën qeverisjen e tij ka ngecur. Investimet e huaja direkte kanë rënë ndjeshëm, projektet kapitale në proces nuk janë përmbyllur asnjë, janë lënë në harresë të gjitha premtimet, të pamirëmbajtura dhe duke u shkatrruar infrastruktura ekzistuese, ndërsa bizneset vendore janë reduktuar/falimentuar e shuar, kurse këto që kanë mbetur po përballen me pasiguri të vazhdueshme. Mungesa e vizionit afatgjatë ka bërë që ekonomia të mbetet peng i improvizimeve dhe i krizave.

Një tjetër fenomen që e ka karakterizuar politikbërjen e kësaj qeverie dhe Kurtit është kapja politike e institucioneve dhe izolimi ndërkombëtar.
Në planin politik, Kurti ka shndërruar Kuvendin dhe institucionet në zgjatime të vullnetit të tij personal. Mekanizmat demokratikë janë anashkaluar, ndërsa debati politik është zëvendësuar me përplasje propagandistike. Marrëdhëniet me aleatët strategjikë janë dëmtuar rëndë, duke e izoluar Kosovën dhe futur nën masa sanksionuese, në momentet kur më së shumti i nevojitet mbështetje ndërkombëtare. Deshmi e këtij zolimi është edhe nota zyrtare e vetë BE – EUROPEAN UNION OFFICE IN KOSOVA e 8 Gushtit 2025.

Ajo që brengosë më së shumti është siguria kombëtare që është në rrezik.
Në kontekst të fushës së sigurisë, qeverisja e Kurtit ka dështuar të menaxhojë krizën në veri. Vendimet e improvizuara dhe mungesa e strategjisë shtetërore kanë shkaktuar tensione të reja, duke rrezikuar stabilitetin e brendshëm dhe duke ekspozuar Kosovën ndaj presioneve të jashtme.
Me çdo veprim e vendim politik ka ndikuar në përforcimin arkumentues të kërkesës serbe për autonomi territoriale, politike, kulturore, ekonomike e sociale.

Tani kur procesi gjyqësor në Dhomat Speciale po përballet me objeksionet e mbrojtjes, po dalin në sipërfaqe kontributorët bashhkëpunues të prokurorisë dhe shërbimit sekret serb që kanë ofruar dëshmi, analiza pseudoshkencore, siç ishte rasti me kryeparlamentarin aksidental dhe qëndrimin anti-UÇK, si dhe bashkëpunimi me narrativat serbe dhe ruse, për lëvizjen kombëtare të shqiptarëve dhe UÇK.
Ndër aspektet më shqetësuese të qeverisjes së tij është qëndrimi i Kurtit dhe bashkëpunëtorëve të tij ndaj UÇK-së dhe luftës për lirim.
Përmes kabinetarëve të afërt si Shkëlzen Gashi, ministrja Donika Schwarz, si dhe me mbështetjen e kryeparlamentarit aksidental nomad Dimal Basha, është legjitimuar narrativa që e etiketon UÇK-në dhe tërë plejaden e Lëvizjes sonë Kombëtare si “Ndërmarrje e Përbashkët Kriminale”.
Kjo është një shërbim i drejtpërdrejtë për propagandën serbe dhe për dosjet e prokurorisë së Serbis kundër luftës së drejtë të popullit të Kosovës.

Deklarata e Kurtit se problemet e sotme janë trashëgimi e qeverive të kaluara është një alibi e tejkonsumuar.
Me ketë gjuhë vetëm sa po përpiqet të përmbush misionin e politik se: “shërbëtorët e Serbisë, urrejtjen ndaj UÇK e kanë detyrë, urrejtjen ndaj lirisë e ka qëllim!”

Në realitet, problemet e Kosovës janë prodhuar, thelluar dhe shumëfishuar gjatë qeverisjes së tij. Ai erdhi në pushtet duke akuzuar të tjerët, dhe po mundohet të qëndrojë në pushtet me të njëjtën gjuhë mashtrimi. Ndërkohë, Kosova ka humbur kohë, zhvillim, aleatë dhe mbi të gjitha, është rrezikuar trashëgimia më e shenjtë e saj – lufta për liri dhe sakrifica e UÇK-së.