
Mbyllja totale e Holandës, Ambasada e Kosovës vjen me një njoftim të rëndësishëm
Ambasada e Kosovës në Holandë ka bërë me dije se mbyllja totale si pasojë e Covid-19 që do të aplikohet nga sot në këtë shtet, do të vlejë deri më 14 janar.
Masat e ndërmarra nga qeveria holandeze shkaku i variantit “Omicron” të Covid-19, përfshijnë edhe mbylljen e një sërë veprimtarive.
“Qeveria e Holandës ka marrë vendim për masa të reja kufizuese për parandalimin e përhapjes së virusit Covid 19, duke filluar me mbyllje nga sot (e diel, 19 dhjetor 2021). Masat të cilat synojnë parandalimin e përhapjes edhe më të madhe të variantit ‘Omicron’, përfshijnë: vetëm dyqanet thelbësore si supermarketet, dyqanet ushqimore dhe farmacitë – do të mbeten të hapura. Shkollat do të mbyllen, së bashku me baret, restorantet, kinematë, teatrot, muzetë dhe vendet e koncerteve. Rregullat do të zbatohen deri më 14 janar. Të gjitha shkollat do të mbyllen nga e hëna në mëngjes deri të paktën më 10 janar. Kjo vlen edhe për kolegjet dhe universitetet. Ministrat do të vendosin më 3 janar se kur mund të rihapen shkollat. Kujdesi pas shkollës gjithashtu do të mbyllet. Dyqanet, baret, restorantet dhe ambientet do të jenë të gjitha të mbyllura deri më 14 janar. Përjashtim bëjnë supermarketet, dyqanet ushqimore, optikët dhe specialistët e dëgjimit, bibliotekat, pompat e benzinës, farmacitë, autoshkollat, avokatët dhe noterët. Restorantet, baret dhe kafenetë gjithashtu do të mbyllen”, ka njoftuar Ambasadës e Kosovës në Holandë.