Avokati kosovar, Ardian Bajraktari, i cili është angazhuar në mbrojtje të të drejtave të ish-pjesëtarëve të Ushtrisë Çlirimtare të Kosovës përballë Tribunalit të Hagës, ka bërë një apel publik për qytetarët.

Ai u ka bërë thirrje të gjithë qytetarëve që të marrin pjesë në mënyrë masive në protestën e paralajmëruar për datën 7 gusht, duke theksuar rëndësinë e unitetit dhe mbështetjes ndaj të akuzuarve për krime lufte në këtë proces të ndjeshëm.

Postimi i plotë i Bajraktarit:

Me pjesëmarrje në protestën e 7 Gushtit, lë të dëshmojmë se çlirimtarët tanë nuk janë vetëm, se populli është me ta, se populli nuk e do dhe nuk e duron padrejtësinë.

Pjesëmarrja sa më masive, është dëshmi se historia nuk mund të ndryshohet dhe procese jo të pakta gjyqësore e kanë konfirmuar se lufta e Ushtrisë Çlirimtare të Kosovës ka qenë luftë çlirimtare.

Lufta e UÇK-së ka qenë luftë e pastër dhe se me “prova” nga Serbia nuk mund të ndryshohet historia jonë e lavdishme.

Çlirimtarë, jemi me juve, liria jonë është e plotë kur ju do jeni të lirë!

Nga sheshi i Prishtinës lë të ua bëjmë të qartë vendeve financuese të Gjykatës Speciale se buxheti mbi 100 milionë euro vetëm për dy vite nga kjo gjykatë, po përdorën për padrejtësi.