Medvedevi thotë se do të vazhdojë të jetë kryetar i partisë Rusia e Bashkuar

19 janar 16:50

Ish-kryeministri rus, Dmitry Medvedev, ka thënë sot se do të vazhdojë të jetë kryetar i partisë në pushtet, Rusia e Bashkuar, parti kjo që së bashku me presidentin rus, Vladimir Putin kanë dominuar skenën politike të vendit për dy dekada.

Medvedevi ka dhënë dorëheqje së bashku me qeverinë e tij, pasi Putini gjatë fjalimit vjetor më 15 janar, ka bërë thirrje për referendum për disa ndryshime kushtetuese, që sipas tij, do të forconin pushtetin e parlamentit.

Agjencitë e lajmeve ruse më pas thanë se presidenti Putin dëshiron që të krijojë pozitën e zëvendëskryetarit të Këshillit të Sigurisë së Rusisë – që formalisht udhëhiqet nga Putini – dhe këtë pozitë t’ia ofrojë Medvedevit.

“Nëse flasim për një punë të re specifike, kjo pozitë nuk bie në kundërshtim me përfshirjen time në aktivitet politik, përfshirë aktivitetin në lidhje me udhëheqjen e partisë. Unë mbetem kryetar i partisë Rusia e Bashkuar”, ka thënë Medvedevi për “Rossiya 1 TV”, raporton agjencia “Tass”.

Medvedevi ka shërbyer si kryeministër në vitet 2008-2012, ndërmjet mandatit të dytë dhe të tretë presidencial të Putinit. Sipas kritikëve, kjo është bërë, me qëllim që Putini të mos tejkalojë kufizimet kushtetuese për të qenë në krye të vendit.

Ligjvënësit në Dumën shtetërore, ku Rusia e Bashkuar ka shumicën, më 16 janar, votuan për kandidatin e Putinit për kryeministër, Mikhail Mishustin.

Disa vëzhgues dyshojnë se njoftimi i Putinit për ndryshimet kushtetuese, do të bëjnë që ai të qëndrojë në postin e presidentit edhe pasi t’i kalojë mandati më 2024.

Lajme të sponsorizuara

Të fundit
Dukuria e fajdesë, që nënkupton huazimin e parave të cilat…