Vdekja e hershme e 15 vjeçares, Qëndresa Syla në aksidentin rrugorë, si dhe lëndimi i motrës së saj binjake, ka prekur të gjithë.

Përmes një përkujtimi, Shkolla e Mesme Mjekësisë “Dr.Xheladin Deda”, ku ajo vijonte mësimet ka shkruar disa rreshta mjaftë prekëse, duke ngritur lartë personalitetin e saj që në këtë moshë të hershme rinore.

Ja se si përkujtohet Qëndresa nga shokët dhe shoqet e saj:

Të pikëlluar familje Syla, farefis e miq të familjes, nxënës e mësimdhënës! Sot si asnjëherë, jemi të pikëlluar dhe plot dhimbje në shpirt. Sot po ndahemi fizikisht nga bija juaj, nxënësja dhe shoqja jonë, Qëndresa.

Sot qielli është i zymtë dhe të zymta janë edhe fytyrat tona. Zemrat na janë copëtuar e shpirti na është lënduar nga kjo ndarje. Sot, Qëndresa, ti po ndahesh nga ne, por zymtësinë fytyrave tona do t’ua largojë kujtimi i përjetshëm për ty. Kjo ndarje është e rëndë dhe e dhimbshme për ne. Ti u nise në rrugëtimin në të cilin do nisemi secili prej nesh, se kështu donë Zoti i Madhërishëm.

Qëndresës fatalisht, iu ndërprenë ëndrrat që nuk i kishte të pakta, iu ndal hovi për nxënien e dijës, iu mor e drejta për të shijuar lumturinë dhe kënaqësitë e kësaj bote, e botës së saj të vajzërisë. Qëndresa erdhi bashkë me Agnesën për një ditë në këtë botë, por ajo sot po kthehet e vetme në përjetësi. Agnesa do të na kujtojë atë në dukje e në sjellje, në punë e në vepra.

Qëndresa e donte jetën dhe e tillë ishte, plot jetë. Është kohë e shkurtër që kur të njohëm , por ishe aq e afërt, aq e dashur, aq e shoqëruar dhe aq e formuar për moshën tënde, saqë na duket se te kemi njohur prej vitesh.

Do të kujtojmë për sjelljen shembullore, për ndrojtjen tënde që tregonte pjekurinë e hershme, do të kujtojmë për çiltërsinë dhe pastërtinë e shpirtit. Do të kujtojmë për edukatën me të cilën i bëje krenarë prindërit dhe gjithë neve të cilët të rrinim përreth.
Do na mungosh shumë. Karrigen në klasë na e le bosh dhe ashtu bosh do ta lëmë edhe vendin në bankën tënde, e sipër saj do vendosim një lule kujtim për ty, ashtu siç ishe edhe vet, porsi një lule e njomë, plot jetë e aromë.

Qëndresë, ne do të të kujtojmë përherë sa te jetë jeta dhe kjo ndarje nga ti do të mbetet vragë e thellë në zemrat tona, por kujtimi për ty do të jetë melhem për të.
Njeriu nuk e donë vdekjen, por shpirti e donë përjetësinë! U prehsh në parajsë, Qëndresa! Kujtimi për ty do mbetet i përjetshëm për ne! I lehtë të qoftë dheu i kësaj toke!

Drejtoria e shkollës, nxënësit , mësimdhënësit, i gjithë stafi i SHMLM “Dr. Xhekadin Deda” dhe Këshilli i prindërve në emër të të gjithë prindërve, i shprehin ngushëllime shokëve të klasës së Qëndresës klasës X-1, familjes së ngushtë dhe të gjerë Syla, dhe gjithë miqve dhe të afërmëve të familjes së të ndjerës!