Fituesi i tetëfishtë i “Topit të Artë” dhe njëherësh kampioni botëror me Argjentinën, Lionel Messi, ka reaguar në rrjetet sociale pas suksesit të ish-klubit të tij, FC Barcelona, e cila ka siguruar titullin e La Ligës pas fitores në “El Clasico” ndaj Real Madrid, nën drejtimin e trajnerit Hansi Flick.

Skuadra katalunase është shpallur kampione e Spanjës pas një ndeshjeje vendimtare në shtëpi, ku golat e Marcus Rashford dhe Ferran Torres ia kanë siguruar tri pikët që kanë vulosur matematikisht titullin.

Menjëherë pas përfundimit të ndeshjes, urimet dhe mesazhet përgëzuese nisën të vinin nga figura të shumta të futbollit botëror, ndërsa Messi ishte ndër të parët që reagoi.

Sulmuesi argjentinas publikoi një mesazh të shkurtër, por emocional në “Instagram”, duke festuar suksesin e ish-ekipit të tij. “Kampionë. Forca Barcelona”, ka shkuar Messi.