Pak para fillimit të sulmeve ajrore të Izraelit ndaj Iranit, ministri izraelit i Mbrojtjes, Israel Katz, deklaroi se vendi po përjeton një moment historik të pazakontë dhe vendimtar.

Në një fjalim të mbajtur para një forumi të zyrtarëve ushtarakë, Katz tha se “ky është një moment përcaktues në historinë e Shtetit të Izraelit dhe në historinë e popullit hebre”.

Katz theksoi se ndalimi i programit bërthamor të Iranit ka qenë përparësia e tij kryesore që nga marrja e detyrës. Ai akuzoi Iranin se është “më i vendosur se kurrë” për të përmbushur qëllimin e shkatërrimit të Izraelit dhe paralajmëroi se vendi është në një pikë kritike: “Nëse nuk e arrijmë ta ndalim tani, nuk do të kemi më mundësi të parandalojmë Iranin nga sigurimi i një arme bërthamore që kërcënon ekzistencën tonë.”

Ministri shtoi se, pas më shumë se një viti e gjysmë të përballjes me përfaqësuesit iranianë në rajon, “tani po trajtojmë vetë kokën e gjarprit” – duke nënkuptuar një përqendrim të drejtpërdrejtë në udhëheqjen qendrore të Iranit.