Ministri në detyrë i Shëndetësisë, Armend Zemaj, u ka bërë thirrje qytetarëve që të vazhdojnë me respektimin e masave kundër përhapjes së Covid-19.

Ai përmes një postimi në llogarinë e vet në “Facebook”, ka përmendur situatën me rritjen e numrit të të infektuarve në Evropë, por ka thënë se Kosova po vazhdon ta menaxhojë mirë gjendjen me pandeminë, raporton “Epoka e re”.

“Qytetarë të nderuar, respektoni masat anti-Covid! Përderisa të gjitha shtetet evropiane janë duke u përballur me numër të madh të pacientëve të infektuar me Covid-19, vendi ynë suksesshëm po vazhdon ta menaxhojë situatën epidemiologjike në vend. Nga 1 586 mostra të marra brenda 24 orëve, 253 kanë rezultuar pozitive, 646 kanë fituar betejën me Covid-19, ndërsa kemi dy vdekje”, ka shkruar Zemaj.

Ai ka falënderuar qytetarët për bashkëpunimin e deritanishëm që kanë treguar me institucionet e vendit, për respektim të masave anti-Covid. “Ju ftoj që edhe më tej të vazhdojmë bashkë luftën kundër Covid-19. Jam përpjekur maksimalisht që kuadrit profesional dhe shumë të përkushtuar, t’i shtohen 1 500 specializantë, punësimin e të gjithë mjekëve të papunë, si dhe shtimin e personelit shëndetësor për 608 punonjës. Kuadri profesional, ka gjetur angazhim të plotë në sistemin shëndetësor të vendit dhe largimi i mjekëve nga Kosova është zvogëluar shumë duke gjetur këtu perspektivën”.

“Edhe një herë ju siguroj qytetarë të vendit tim që tashmë kemi siguruar 1,220,000 vaksina anti Covid.
Deri në arritjen e vaksinave anti-Covid, të vazhdojmë t’i respektojmë masat, të mos i ngarkojmë institucionet shëndetësore dhe të gjithë të hospitalizuarit jo vetëm me Covid por edhe për nevojat dhe shërbimet tjera shëndetësore”, ka shkruar ministri Zemaj.