Ministrja Hoxha kërkon përkrahjen e Gjermanisë për vizat

03 tetor 2018 | 11:33

Ministrja e Integrimit Evropian, Dhurata Hoxha, ka pritur në takim sekretaren e Shtetit në Ministrinë Federale për Bashkëpunim dhe Zhvillim Ekonomik, njëherësh anëtaren e Bundestagut gjerman, Maria Flachsbarth, me të cilën ka diskutuar për liberalizimin e vizave si dhe procesin integrues.

Ministrja Hoxha ka theksuar se kushtet për liberalizimin e vizave sipas udhërrëfyesit të gjitha 95 janë përmbushur, tashmë ka filluar fushata për informimin e qytetarëve për lëvizjen e lirë, duke shpërndarë materiale edhe në gjuhët e komuniteteve në të gjitha lokalitetet e vendit.

Ajo ka falënderuar Flachsbarth për kontributin e Gjermanisë në zgjidhjen e sfidave të Kosovës.

“Kosovës i duhet përkrahja për përshpejtimin e vendimmarrjes brenda këtij viti – sepse i kemi përmbushur të gjitha 95 kriteret. Vota e Gjermanisë në Këshillin e Ministrave është me rëndësi thelbësore për këtë proces”, ka deklaruar ministrja Hoxha, duke e njoftuar Flachsbarth për fushatën e informimit për liberalizimin e vizave.

“Qytetaret e Kosovës nuk do ta keqpërdorin këtë të drejtë”, vuri në dukje ministrja.

Sekretarja e Shtetit, njëherësh edhe deputete e Bundestagut gjerman, Maria Flachsbarth, ka vlerësuar lart përkushtimin e Kosovës në përmbushjen e kushteve për liberalizim, duke vënë në pah rëndësinë e fuqizimit të sundimit të ligjit dhe Agjendën Evropiane të Reformave.

Ajo ka theksuar se Gjermania ka shprehur qëndrimin e vet për zgjerimin e BE-së drejt Ballkanit perëndimor, rëndësinë e paqes në këtë pjesë të Evropës si dhe zhvillimin ekonomik, duke ofruar përkrahje të gjithanshme për proceset aktuale nëpër të cilat po kalon Kosova.

/Epoka e re/

Lajme të sponsorizuara

Të fundit
Italia sfidoi presionin nga Brukseli dhe partnerët e saj të…