Avokati Luka Mishetiq, ka thënë se kërkesa e prokurorisë për 45 vjet burgim për Hashim Thaçin dhe tre të akuzuarit tjerë, është në mënyrë efektive dënim i përjetshëm.

Ai ka thënë se prokuroria nuk ka parë as faktor zbutës në këtë çështje, duke e quajtur edhe parashtrim të pabesueshëm për faktin se Dhomat e Specializuara të Kosovës dhe Zyra e Prokurorit të Specializuar ekzistojnë falë Thaçit dhe se ato u krijuan për ta pastruar emrin e tij.

“Ky është një parashtrim i pabesueshëm. Kjo është e qartë, relevante dhe zbutëse se z.Thaçi bashkëpunoi me prokurorin, dha dorëheqje si presidenti, u dorëzua dhe erdhi në Hagë për t’u përballur me këtë gjykatë, për të pastruar emrin e tij”.

“Ata kanë kërkuar 45 vjet dënim që është në mënyrë efektive dënim i përjetshëm. Pika fillestare e ZPS-së është që nuk ka faktorë zbutës në këtë çështje. Kjo është një parashtrim i pabesueshëm nga një zyrë që e di që DhSK-ja dhe ZPS-ja nuk do të mund të ekzistonin po të mos ishte i akuzuari”, ka thënë Misetiq.

Misetiq ka thënë se fakti që Thaçi ka bashkëpunuar me organet e drejtësisë dhe iu është dorëzuar atyre, është rrethanë zbutëse.

Përpara kësaj, Misetiq ka thënë se është e çuditshme që të bëjmë parashtrime për dënimin në një pikë ku mbrojtja është e pasqyruar me qëndrimin e saj dhe rezultati i vetëm është lirimi dhe shpallja i pafajshëm i Thaçit.

Për të folur për dënimin, Misetiq ka thënë se rrezikohet që të krijohet përshtypja e gabuar se mbrojtja pranon mundësinë e shpalljes fajtor.