Ministria e Infrastrukturës financon projektet infrastrukturore lokale në Prizren

19 mars 2019 | 12:13

Ministri i Infrastrukturës dhe Transportit, Pal Lekaj, ka pritur sot në një takim pune kryetarin e Prizrenit Mytaher Haskuka, më të cilin ka nënshkruar marrëveshje bashkëpunimi për realizimin e projekteve të reja infrastrukturore lokale në këtë komunë.

Komuna e Prizrenit me anë të kësaj marrëveshje me MIT-në, përfiton 400,000 euro për vitin 2019.

Lekaj dhe Haskuka nënshkruan edhe aneksin e memorandumit paraprak për financim të projekteve që veçse janë duke u zhvilluar në Prizren.

MIT-ja merr përsipër financimin e asfaltimit të rrugës Lubizhdë – Skrobizhdë, ku për këtë vit janë ndarë mjetet prej 50,000 euro dhe asfaltimin e rrugës Prizren – Velezhë, në vlerë prej 50,000 euro.

Ministri Lekaj ka kërkuar nga kryetari Haskuka që realizimi i projekteve të financuara nga dikasteri që ai drejton, të bëhet me cilësi dhe sipas afateve kohore të parapara.

Ai i ka premtuar kryetarit se mbështetja nga niveli qendror i qeverisjes, pa dallim bindjesh, nuk do të mungojë edhe në të ardhmen.

I pari i MIT-së e njoftoi kryetarin e Prizrenit se për këto projekte janë të parapara edhe mjetet buxhetore për vitet që pasojnë deri në realizimin final të tyre.

Ndërkaq e informoi të parin e kësaj komune se shumë shpejt do të fillojnë investimet edhe në hyrjen e Prizrenit nga ana e Gjakovës, projekt ky që financohet nga kredia e Bankës Evropiane për Rindërtim dhe Zhvillim.

Kryetari i Prizrenit e ka falënderuar ministrin për këtë mbështetje, duke u zotuar se projektet e financuara nga MIT-ja do të realizohen në afatet e parapara.

Ai ka shtuar se mbështetja për komunën që ai drejton, nënkupton mbështetje direkte për qytetarët, të cilëve po u kthehen taksat nëpërmjet investimeve në infrastrukturë.

/Epoka e re/

Lajme të sponsorizuara

Të fundit
Të gjeturat nga monitorimi i tri kontratave për furnizim me…