Ish-mesfushori i Real Madridit, Luka Modriq, ka folur hapur për vendimin e tij për t’iu bashkuar AC Milanit pas përfundimit të aventurës së gjatë në “Santiago Bernabeu”. Shumë klube donin transferimin e veteranit kroat, por ai ka zbuluar se Milanit iu bashkua pasi donte të luante në Evropë dhe të luante futboll konkurrues. “Pse AC Milan? Doja të qëndroja në Evropë dhe të vazhdoja të luaja futboll konkurrues”, ka thënë Modriqi.

“Kisha disa oferta të tjera, por kur Milani u shfaq, ishte e qartë për mua. Isha gati që nga momenti i parë”, ka shtuar Modriçi. Ai tregoi se klubi kuqezi e kishte bindur që në fillim me seriozitetin e qasjes dhe me projektin e tyre.

“Më bëri përshtypje se si erdhën në Kroaci për të ma prezantuar projektin dhe gjithçka tjetër. Kjo ishte shumë e rëndësishme për mua. Milani është një nga klubet më të mëdha në Evropë”, ka përfunduar mesfushor kroat i cili pritet të jetë një nga liderët e rinj të skuadrës së Massimiliano Allegrit.