Muriqi theksoi se atmosfera në kampin e Kosovës është e shkëlqyer dhe ekipi është përgatitur në detaje për sfidën.

“Jemi përgatitur për nesër dhe kemi bërë analizat tona. E njohim Zvicrën dhe pikët e saj të dobëta. Sot kemi lojtarë të nivelit të lartë dhe jemi ekipe të barabarta. Shpresoj që në fund të dalim fitues dhe të gëzojmë tifozët në stadium”, tha ai.

Sulmuesi prizrenas u ndal edhe te dy emrat e rinj që i janë bashkuar Dardanëve, Leon Avdullahu dhe Veldin Hoxha, duke i vlerësuar lart:
“Janë lojtarë me kualitet të lartë. Besoj se do ta përfaqësojnë shtetin tonë në mënyrën më të mirë”.

Edhe pse Kosova do të përballet me mungesat e rëndësishme të Edon Zhegrovës dhe Milot Rashicës, Muriqi është i bindur se skuadra ka treguar më herët se mund të reagojë edhe në situata të tilla.

Ai vlerësoi lart Albion Rrahmanin dhe Fisnik Asllanin, duke i parë si bartësit e së ardhmes në sulm.

“Unë jam këtu për t’i përkrahur. Për mua, Albion Rrahmani dhe Fisnik Asllani janë më të mirë se unë. Shpresoj që një ditë të thyejnë rekordin tim të golave me Kosovën”, deklaroi ai me modesti.