Me rastin e 12-vjetorit të miratimit të Kushtetutës së Republikës së Kosovës, kryetari i LDK-së, Isa Mustafa, ka uruar të gjithë qytetarët e vendit.

“Të nderuar qytetarë të Republikës së Kosovës, sot, bëhen 12 vite nga miratimi i Kushtetutës së Republikës së Kosovës. Kjo ditë shënon një ndër momentet më të rëndësishme të shtetit demokratik të Kosovës. Kushtetuta është akti më i lartë juridik që vuri themelet e ndërtimit, funksionimit dhe organizimit të shtetit modern të Kosovës, ku përcaktohen dhe mbrohen vlerat themelore të vendit”, është thënë në urimin e Mustafës.

Ai ka thënë se Kushtetuta e Republikës së Kosovës, është çelësi themelor dhe garanci mbi të cilin mbështetet funksionimi i institucioneve vitale.

“Kushtetuta është akti më i lartë politik dhe juridik i vendit tonë, garantues i të drejtave dhe lirive të të gjithë qytetarëve. Më 9 Prill 2008, Kosova u radhit si shumë shtete të zhvilluara që ta bëj respektimin e të drejtave të njeriut, garantimin e paqes dhe demokracisë si vlera themelore të njerëzimit. Ky dokument i dha jetë pavarësisë së Kosovës. Kushtetuta e Republikës së Kosovës është akti më sublim, i cili ngërthen tërë sakrificën dhe angazhimin e gjeneratave të tëra që punuan dhe u flijuan”.

“Shteti i së drejtës duhet të jetë mision për të gjithë ne, dhe realizimin e këtij definicioni duhet ta mundësojmë të gjithë bashkërisht që të kemi një shtet demokratik dhe të përparuar. Institucionet tona duhet çdo ditë të punojnë konfrom neneve të kësaj kushtetute në mënyrë që ta kemi një shtet modern, model të cilin e kemi synuar. Urime Dita e Kushtetutës të Republikës së Kosovës””, është thënë në urimin e kryetarit të LDK-së.