Mbrojtësi shqiptar Shkodran Mustafi, pas shumë spekulimeve gjatë afatit kalimtar të verës lidhur me largimin nga “Emirates Stadium”, ka thënë se nuk do të fillojë një “luftë” me skuadrën e Arsenalit për të ardhmen e tij.

Trajneri Unai Emery kishte paralajmëruar Mustafin të gjejë një ekip të ri gjatë verës, por ai nuk u largua dhe tash trajneri Emery ka paralajmëruar se Mustafi mund të ketë të ardhme në klub. Ish-reprezentuesi i Gjermanisë bëri paraqitjen e tij të parë këtë sezon duke luajtur tërë ndeshjen në fitoren 3-0 ndaj Eintracht Frankfurt në Ligën e Evropës.

“Kurrë nuk kam qenë në mesin e atyre që fillojnë një luftë sepse diçka nuk funksionon”, ka thënë Mustafi. “Gjithmonë kam thënë, nëse është e mundur jam i gatshëm të bëjë hapin tjetër. Nëse jo, do të vazhdoj të luaj futbollin tim. Babai im, që është edhe menaxher i imi, ka biseduar me klubin. Jam futbollist i Arsenalit dhe kam edhe dy vite në kontratën time”, ka shtuar Mustafi.