Dje, në OKB, në “Ditën Ndërkombëtare të Eliminimit të Dhunës Seksuale në Konflikte”, u mbajt konferenca: “Hearing Their Voices – Championing Their Rights”, bashkë-organizuar nga misionet e përhershme të Shqipërisë, Ukrainës dhe Sudanit.

Ambasadori Blerim Reka, së bashku me stafin e Konsullatës së Përgjithshme të Republikës së Kosovës në Nju Jork, morën pjesë në këtë konferencë, të moderuar nga ambasadorja Suela Janina, me adresim edhe nga Pramila Patten (Përfaqësuese Speciale e Sekretarit të Përgjithshëm të OKB-së për Dhunën Seksuale në Konflikte).

Për dhunën seksuale të ushtruar nga forcat ushtarake dhe policore serbe gjatë luftës, dëshmoi e mbijetuara e kësaj dhune, Vasfije Krasniqi-Goodman, njëherësh e Dërguara e Posaçme e presidentes së Republikës së Kosovës, Vjosa Osmani, për të mbijetuarit e dhunës seksuale gjatë luftës.

Ndërkaq, me video-lidhje nga Prishtina, u drejtua Feride Rushiti, drejtoresha e KRCT-së, ndërsa pjesë e panelit ishte edhe Vera Mjeku, drejtoreshë e “Reallty for Her Justice”.

Edhe një dëshmi para organizatës botërore për tmerrin nëpër të cilin kaluan mbi 20,000 gra shqiptare, të dhunuara nga ushtria pushtuese serbe gjatë luftës në Kosovë.