Sot, në 23-vjetorin e vrasjes së Ukë Bytyçit, bashkë me zonjën Kimete, fëmijët Shqipen e Flamurin, e bashkëveprimtarët politikë, kryetari i LDK-së, Lumir Abdixhiku, ka shpalosur pllakën përkujtimore të Ukë Bytyçit në selinë qendrore të Lidhjes Demokratike të Kosovës.

“Uka është vendosur aty ku e meriton, pranë bashkëveprimtarëve të mëdhenj të kauzës sonë kombëtare: Enverit, Xhemës, Shabanit, Ismetit e Nekibes – në Koridorin e Kujtesës. Jeta e tij është rrëfimi i një brezi që e deshi Kosovën me punë, me guxim dhe me përkushtim të pashoq. Nga demonstratat e ‘81-shit, në themelimin e LDK-së, në organizimin e rezistencës, në luftën për liri në Zonën Operative të Pashtrikut, dhe në drejtimin e Suharekës si kryetar komune, Ukë Bytyçi mbetet shembull i njeriut që jetoi për idealin e lirisë dhe për shërbimin ndaj qytetarëve”, ka shkruar Abdixhiku në “Facebook”.

Abdixhiku ka theksuar se ai u vra më 27 tetor 2002, vetëm një ditë pas fitores së tij të dytë zgjedhore, por idealet e tij nuk u shuan kurrë.

“Sot, LDK-ja e nderon e kujton me mirënjohje të thellë një prej bijve të saj më të denjë, një simbol të qëndresës dhe të dashurisë për Kosovën. Lavdi jetës dhe veprës së Ukë Bytyçit”, ka shkruar Abdixhiku.