Nezir Çoçaj, ish-ushtar i Ushtrisë Çlirimtare të Kosovës dhe njëri nga aktivistët e hershëm të Partisë Demokratike të Kosovës (PDK), ka vendosur t’i japë fund rrugëtimit të tij politik brenda kësaj partie. Përmes një postimi në rrjetin social Facebook, Çoçaj ka njoftuar se tashmë i është bashkuar Nismës Socialdemokrate, që udhëhiqet nga Fatmir Limaj.

Në njoftimin e tij publik, Çoçaj shpreh zhgënjimin me gjendjen aktuale në qeverisjen komunale të Prizrenit, duke theksuar mungesën e punës në të mirë të qytetarëve, mungesën e ndershmërisë dhe përhapjen e padrejtësive. Ai shprehet se këto arsye e kanë shtyrë të marrë një vendim të ri në angazhimin e tij politik.

“Synimi im është të jem pjesë e listës zgjedhore të kësaj partie dhe të punoj për një qeverisje të drejtë, të ndershme dhe të dobishme për qytetarët e Prizrenit,” ka deklaruar Çoçaj.

Ai ka falënderuar përkrahësit dhe votuesit e tij për mbështetjen në zgjedhjet e kaluara, duke u zotuar se do të vazhdojë të angazhohet për të mirën e qytetit, këtë herë nën flamurin e Nismës.

Kalimi i Çoçajt në Nismën Socialdemokrate pritet të ketë ndikim në skenën politike lokale, veçanërisht në komunën e Prizrenit, ku ai ka pasur një bazë të konsiderueshme mbështetjeje si anëtar i PDK-së.

Në foto: Albulena Balaj Halimaj, Nezir Çoçaj dhe  Xhevdet Krasniqi.