![](https://www.epokaere.com/wp-content/uploads/2020/04/UnitedHealthcare_has_waived_all_diagnostic_test_cost_sharing_for_insured_members_for_Covid_19_testing__pic___3.11.20du___covid_19_4908692_1920__1____Pixabay.5e68f5c663587-600x360-1.png)
Nis peticioni për anulimin e testeve për COVID të dërguara nga Serbia
Ka filluar një peticion, me të cilin synohet të mblidhen të gjithë kundërshtuesit e “ndihmës” nga Serbia pa dallime, me të cilin do t’i kërkohet qeverisë në detyrë që menjëherë të anulojë këtë dërgesë.
Nëpërmjet një njoftimi thuhet se dërgesa e fundit që erdhi nga Serbia ishin votat e helmuara që dërguan mbi 20 punëtorë të KQZ në QKUK.
“Nuk i zëmë besë Serbisë e as nuk e duam lëmoshën e atyre që na djegën e na vranë. Serbia duhet të jap përgjegjësi për masakrat, të pagjeturit, të dhunuarat, të burgosurit politik e rrënimin e ekonomisë në Kosovë, ndërsa përmes pranimit të kësaj “ndihme”, ne e maskojmë me humanizëm fytyrën kriminale të Vuqiçit dhe ish-vartësve të tjerë të Milosheviçit. Të bashkuar në këtë peticion kërkojmë nga Qeveria në detyrë anulimin e menjëhershëm të kësaj dërgese”, thuhet në njoftim.
Peticioni përfaqësohet nga Fitim Çeku, gazetar dhe Granit Geci, Driton Bardheci, Endrit Zabërgja, aktivistë politikë.