Pas reshjeve të dendura dhe erërave të forta që përfshinë bregdetin një ditë më parë, Velipoja është rikthyer sot në qetësi.

Pushuesit kanë mbushur sërish plazhin duke shijuar diellin dhe temperaturat e ngrohta, ndërsa gjurmët e stuhisë janë pastruar shpejt nga bizneset dhe shërbimet e plazhit.

Edhe pse moti i keq solli shqetësim të përkohshëm, pushuesit e konsiderojnë atë si një episod të rrallë veror, ndërsa Velipoja vazhdon të mbetet një ndër destinacionet më të preferuara në veri të vendit.

“Dje ka qenë lagështirë, por jemi të kënaqur në përgjithësi. Ka gjëra që argëtohesh, shëtit“, shprehet një pushues.

“Jam nga Kosova. Jam për herë të parë. Të tjera herë gjithmonë kam qenë në Shëngjin“.

“Na pëlqen këto vende, o mirë, është lirë për ne edhe kështu ka na pëlqyer. Moti i keq dje s’na ka pengu fort, mirë në rregull është”, ka shtuar një tjetër pushues.

Me rritjen e fluksit të vizitorëve çdo verë, Velipoja po konsolidohet gjithnjë e më shumë si një ndër plazhet më të frekuentuara të bregdetit shqiptar.