Mosmarrëveshja midis Tajlandës dhe Kamboxhias daton më shumë se një shekull më parë, kur u caktuan kufijtë e dy vendeve pas pushtimit francez të Kamboxhias, shkruan BBC.

Situata u bë zyrtarisht armiqësore në vitin 2008, kur Kamboxhia u përpoq të regjistronte një tempull të shekullit të 11-të, i cili ndodhet në një zonë të diskutueshme, si një vend i Trashëgimisë Botërore të UNESCO-s – një veprim që u prit me protesta të ashpra nga Tajlanda.

Gjatë viteve ka pasur përplasje të herëpashershme, ku janë vrarë si ushtarë, ashtu edhe civilë nga të dyja palët.

Tensionet e fundit u përshkallëzuan në maj, pasi një ushtar kamboxhian u vra gjatë një përplasjeje. Kjo e çoi marrëdhënien dypalëshe në pikën më të ulët në më shumë se një dekadë.

Gjatë dy muajve të fundit, të dy vendet kanë vendosur kufizime të ndërsjella në kufi.

Kamboxhia ndaloi importet nga Tajlanda, si fruta dhe perime, dhe ndaloi gjithashtu importin e energjisë elektrike dhe shërbimeve të internetit.

Gjithashtu, të dy vendet kanë shtuar praninë e trupave ushtarake përgjatë kufirit në javët e fundit.